• Тәвәллуд
• 06 Шілде, 2023

Баш егимиз Сизгә, Ана

Мән қошмәмәтлик Һәсән Сидиқов билән турмуш қуруп, бу аилигә келин болуп чүшкәндин кейин һәқиқий мәнасида һаят мәктивидин өттүм. Ениғирағи, чоң өйниң чириғини яндурмисамму, анда-санда келип турғанниң өзидә қейинанамдин көп нәрсини үгәндим. Өй тирикчилиги, бала тәрбийиси, қериндашлар мунасивити дегәндәк... Бу күнләрдә маңа һаят бәргән анамдин кейинки «иккинчи устазим» – қейинанам Зәйнәп Сидиқова, тил тәгмисун, санақлиқ күнләрдин кейин 100 яшқа толиду.
 Зәйнәп анимиз йолдиши Мәрип атимиз билән 36 йешида тарихий Вәтинимиздин Қазақстан дияриға көчүп чиқип, пүткүл аңлиқ һаятини Хәшкиләң (һазирқи Қарасай) наһийәсиниң Қошмәмәт йезисида өткүзиду. Йеңи йәргә орунлишип, сиңип кетиш, әлвәттә, яш аилигә асанға чүшмәйду. Әйнә шундақ еғир пәйтләрдә уларға холум-хошнилири билән жутниң инавәтлик адәмлири һаҗәтлик йол-йоруқ, мәслиһитини берип, ярдәм қолини суниду. Һазирму йеқин хошнилири Алийәм вә Зорагүл һәдиләр, шундақла Сақан тәте билән, худди қериндаштәк, қоюқ мунасивәттә, иҗил-инақ өтмәктә. Кичигидин мал беқишниң қир-сирлирини убдан үгәнгән Мәрип ата егиликтә чопан болуп, өмриниң ахириғичә мошу тирикчилигини ташлимайду. Анимиз униңға бирдин-бир ярдәмчи болуш билән биллә «баш-айиғи йоқ» өй ишлири, бала тәрбийиси билән шуғуллиниду. Бириниң кәйнидин бири өсүп келиватқан бәш қиз билән сәккиз оғулни оқутуп, йемәк-ичмәк һәм кийим-кечәк билән тәминләшкә ялғуз атиниң тапавити нәдин йәтсун? Шуңлашқиму анимиз барни охшитип, пәрзәнтлирини «йегәнниң ағзиға, кийгәнниң учисиға қаратмай» заман тәливигә лайиқ инсанлардин қилип йетилдүриду. Келим-кетим, адәмгәрчилик өз алдиға дегәндәк. Шуңлашқиму униңға анилиқ меһри билән тәрбийисидин ташқири тонур-тонур нан йеқип, ағамча-ағамча кир жуюшқа, тикинчилик-ямақчилиққа вақит бөлүшкә, өлчүк йеридә көктатчилиқ қилишқа, арилиқта һосулиниң ашқинини базарға елип чиқип, сетишқа тоғра келиду. Қейинанамниң ләвзидин мошу гәпләрни аңлиғинимда, бүгүнки яшларниң, йәни өзимизниң «йеникниң астида, еғирниң үстидә» бәхитлик яшаватқанлиғимизға шүкри әйлидим. Һәқиқәтәнму шу бир дәвирниң адәмлири немә дегән меһнәткәш, җапакәш һәм чидамлиқ десиңизчу! Биз болсақ, барлиқ оқитимизни заманивий турмуш техникилири бәҗирип бәрсиму, икки-үч балиниң һөддисидин өз дәриҗисидә чиқалмаймиз. 
 Мән бу қисқа мақаләмни бүгүнки күндә 53 нәврә, 97 чәврә вә 44 әврә көрүш бәхтигә еришкән қейинанамни мәдһийиләш үчүнла әмәс, шуниңға охшаш һаятниң җапа-мәшәқитини тартип, һәқиқий Аниниң үлгисини яратқан барлиқ нураний инсанларға баш егип, тазим қилиш мәхситидә яздим, халас.

Мерванәм ИБРАГИМОВА.
Қарасай наһийәси