• Хәйрихаһлиқ
• 25 Желтоқсан, 2014

Йеңи жилни йеңи өйдә қарши алиду

«Жут етиги кәң», дәйду хәлқимиз, Бу һәқиқәткә дайим көз йәткүзүп жүримиз. Чүнки һазир «һәммә нәрсә баяшайәт» дәп қанчә җар салсақму, ярдәмгә муһтаҗ җанлар йетәрлик. Һә, бәш қол бирдәк әмәсқу. Бирлири җениға дава издисә, йәнә бирлирини тәғдир ярға тирәп қойиду.Аяли вапат болғандин кейин бәш пәрзәнди билән қалған Пәрһат Розахуновниму қисмәт әйнә шундақ синаққа алған еди (Бу һәқтә әтиязда «Уйғур авази» гезитида мақалиму елан қилинди). Амма ата һәммигә бәрдашлиқ берип, балилирини тәнтирәтмәй өзи ялғуз беқип тәрбийиләшкә қарар қилди. Мәйип туғулған пәрзәнтлириниң бирини давалаш вә оқутуш үчүн аилиси билән Ақбулақ мәһәллисигә көчүп кәлди. Пәтир яллап, ишқа ярап қалған чоң оғли иккиси ишләп, аилисини асрашқа башлиди. Башқичә болуши мүмкин әмәс еди. Жутида өйи болғини билән иш йоқ. Ақбулақ — һазир уйғурлар зич вә өм яшаватқан бәрикәтлик жутларниң бири. Бу жутта житим-йесир, қерилар, мүмкинчилиги чәкләнгән җанларға ярдәм қолини сунуш яхши әнъәнигә айланған. Баш жигитбешимиз Турғанҗан  Ибрагимов вә мошу қурлар муәллипиниң тәшәббуси билән биз Пәрһат Розахуновниң аилисини ғәмхорлуққа алдуқ. Жутниң қоллап-қувәтлиши билән пәтир һәққи үчүн ахчилиқ ярдәм, отун-көмүр вә озуқ-түлүк җәһәттин қол учимизни берип кәлдуқ. Жил бешида жутумизниң активистлири тәрипидин Розахуновлар  аилисигә өй селип беришкә ярдәмлишиш тәшәббуси көтирилди. Бу инсаний борч, меһриванлиқ, қериндашлиқ туйғулиридин бәрпа болған хәйрихаһлиққа жутумизла әмәс, униңдин «Уйғур авази» гезити арқилиқ хәвәр тапқан көплигән қериндашлиримизму үн қошти. Регионаллиқ мәшрәп әһли, «Заря Востока» оттуз оғул мәшриви (беги Әхмәтҗан Мәхпиров) дәсләпкиләрдин болуп ярдәм қолини сунди. Шәхсий ярдәм бәргәнләрдин сирт жутумиз фондидинму мәбләғ бөлдуқ. Шуни алаһидә тәкитләш керәкки, халис ярдәм бәргән кишиләр өзлириниң исим-шәрипилирини атимаслиқни илтимас қилишатти. Шундиму бу ишқа җавапкәр шәхсләрниң бири сүпитидә мән Ваққас ака Мәмединов, Ришат Самахунов, челәклик Турғанҗан, Фарух, Алимҗан, жутумизниң ақсақаллири Сәйдәхмәт һаҗим, Үсәйин, Икрам вә башқа көплигән қериндашларға миннәтдарлиғимни изһар қилимән. Бу ишларниң бешида болған баш жигитбеши Турғанҗан Ибрагимов, жигитбашлири Камал Палтушев, Муңлуқ Летиповларниңму хизмити бебаһа. Еқидә, әмгәк зайә кәтмиди. Розахуновлар аилиси Йеңи жилни йеңи өйдә, өзлириниң шәхсий өйидә қарши алидиған болди. Бу аилидики бәш пәрзәнтниң чоңлири Пәрәхмәт билән Фурқәт әсқетип қалди. Равқәт мәхсус колледжда оқуйду. Шархәт 7-синип оқуғучиси. Өйниң кәнҗиси, ялғуз қизи Пәризат бийил 6 яшқа толиду. Бүгүн һәммисидин әшу әлтәк қизчақниң хошаллиғи чәксиз. Жут адәмлириму хошал. Чүнки улар гөдәкләр қәлбидики шатлиқни көрүп, өзлиридиму мәмнун болса керәк. Һазир мениңдәк бәхитлик адәм болмиса керәк, — дәйду Пәрһатму хошаллиғини йошуралмай. — Мән пәрзәнтлиримниң көзидин үмүт нурини көрдүм. Бу алийҗанап жутдашлирим арқилиқ йүз бәргән мөҗүзә болди. Шуңа уларға бир өмүр қәриздармән. Әдһәмҗан ИБРАГИМОВ, Ақбулақ мәһәллисиниң жигитбеши. Алмута шәһири.