• Хәйрихаһлиқ
• 20 Наурыз, 2024

«Пәрваз» көпчиликниң көңлидин чиқти

Норуз мәйриминиң беши болған «Көрүшүш күни» Атырав шәһәрлик округқа қарашлиқ Еркинқала йезисида «Нұрлы тал» этношәһәрчиси бәрпа болуп, хәлиқ көп жиғилди. Вилайәтлик «Қоғамдық келісім» җәмийәтлик бирләшмисиниң рәһбәрлигидә униңға 16 этномәдәнийәт мәркизи, «Атырау жастары» яшлар қанити вә җәмийәтлик ишларниң башқиму активистлири иштрак қилди. Мәйрәмниң өз дәриҗисидә өтүшигә шәһәрлик «Пәрваз» Уйғур этномәдәнийәт мәркизиму төһпә қошти. 

Рашидәм РӘҺМАНОВА,
«Uiğur avazi»

Атырав шәһиридә миллитимизниң 50 — 60 вәкили бар. Шуниңға қаримай, улар атыравлиқларниң диққитини өзигә җәлип қилалиди. Чүнки бу йәрдә миллитимизниң қәдрийәтлирини һөрмәтләйдиған инсанлар бар. Шуларниң бири – Гүлназ Имирова. 
Гүлназ кичигидинла өз миллитиниң мәдәнийити билән сәнъитигә алаһидә һәвәс қилип өсти. У шәһәргә келиши биләнла ҖУЭМ Атырав вилайәтлик шөбиси билән алақә бағлап, униң ишлириға паал арилишишқа башлиди. Кейинзә өзи униң рәиси болуп сайланди. 2022-жили Гүлназ шәһәрлик «Пәрваз» Уйғур этномәдәнийәт мәркизини қурди. Шуниңдин бери у пәрзәнтлири Гөзәл, Диана вә Кәрим билән нурғун ишларни атқуруп келиватиду. Миллий моҗутлуқниң пурақ-һиди билән чоң болған балилар аписиға жуқури кәйпият билән ярдәм қилип келиватиду. Уларға қарап кичиккинә нәвриси Мәрийәмму чирайлиқ көйнәк вә допа кийдүрүшини тәләп қилидиған болди.
Шуниң билән 15-норуз – Хәйрихаһлиқ күни Атырав шәһириниң Достлуқ өйидә «Пәрваз» Уйғур этномәдәнийәт мәркизи хәйрихаһлиқ концерт вә йәрмәңкә уюштурди. Униңға барлиқ меһманлар қатарида мүмкинчилиги чәкләнгән балиларму тәклип қилинди. Концерт давамида уйғур хәлқиниң нахша вә уссуллиридин башқа «Былина» рус, татар-башқурт, «Эверия» грузин этномәдәнийәт мәркәзлири, «Санат» вә «Аробеска» уссул ансамбльлириниң сәнъәт һәвәскарлири тәрипидин қазақ, рус, татар-башқурт, грузин вә башқиму хәлиқләрниң сәнъити намайиш қилинди. Меһманлар артистлар билән тәң нахшилар ейтип, шох уссулларға чүшти. Ахирида «Пәрваз» тәрипидин мәйрәмлик соғилар таритилди.
– Көрүшүш мәйрими –Атыравда у һәр жили өтиду. Көрүшүш, Норуз вә башқиму мәйрәмләрдә мәркизимиз вәкиллири билән миллий мәдәнийитимизни, сәнъитимизни, таамлиримизни кәң намайиш қилип келиватимиз. Уйғур хәлқиниң миллий урпи-адәтлирини тонуп, ләззәтлик таамлардин еғиз тегип, йеқимлиқ нахша-сазлиримиздин бәһримән болған жутдашлиримиз бизни яхши тонуп-билиду. Әнди бийил мусулман әһли үчүн улуқ айниң вә күн билән түн тәңлишип, пүтүн йәр зиминини ойғанған Норузниң қатар келиши муһим вақиә болди. Нәтиҗидә нурғун изгү ишлар әмәлгә ашти. Ойлаймәнки, хәйрихаһлиқ ишлирини пәқәт Рамзан ейидила әмәс, бәлки, мүмкинчилиги болса, дайим әмәлгә ашуруп туруш керәк, – дәйду Гүлназ өз ойлири билән бөлүшүп. 

Атырав шәһири