• Әхбаратлар еқими
• 28 Мамыр, 2015

Бензинниң баһаси өсти

«Интерфакс — Қазақстан» әхбарат агентлиғиниң хәвиричә, Қазақстанда Аи — 92/93 маркилиқ бензинниң баһаси 99 тәңгидин 108 тәңгигә өсти. Дизель йеқилғуси вә Аи — 80 бензининиң баһаси илгәрки петичә қалди.«Баһаси дөләт тәрипидин бәлгүлинидиған нефть мәһсулатлирини парчилап сетишниң чәклик баһаси қошулған баһа селиғини һесапқа алған һалда төвәндикичә бәлгүләнсун: дизель йеқилғусиниң баһаси — 99 тәңгә (1 литр), Аи-80 — 89 тәңгә (1 литр) вә Аи — 92/93 — 108 тәңгә (1 литр)», — дейилиду Қазақстан Энергетика министрлигиниң рәсмий сайтида елан қилинған буйруқта. Мәлумки, әң аммибап бензинниң бу түриниң бир литри 119 тәңгигичә көтирилгән еди. Өткән жилниң ахирилирида, дуния базиридики нефьт мәһсулатлири баһасиниң кәскин әрзәнлиши түпәйли Аи — 92/93 маркилиқ бензинниң бир литри 99 тәңгигә чүшүп қалди. Қазақстан Энергетика министрлигиниң билдүрүшичә, баһаниң өсүшигә һазир дуния базирида бир баррель нефтьниң баһаси 65 долларғичә көтирилиши сәвәп болмақта. Насирахун Розахунов. Алмута шәһири