• Әхбаратлар еқими
• 25 Сәуір, 2024

Ассамблея – достлуқ һәм разимәнликниң үлгиси

Қазақстан хәлқи Ассамблеяси – җумһурийитимиздики милләтләрара мунасивәтни мустәһкәмләштә наһайити чоң әһмийәткә егә қурулум. 130дин ошуқ милләт вәкиллиридин тәркип тапқан Қазақстан хәлқиниң өзара достлуғи билән инақлиғини сақлап, уни техиму мукәммәлләштүрүш, вәтәнпәрвәрлик, бәрпакарлиқ роһини күчәйтип, елимизниң сүръәтлик тәрәққий етип, гүллинишигә сәпәрвәр қилиш униң паалийитиниң асаси дәп билимиз. Шундақ екән, қурулумға җай-җайлардин әзалар сайлинип, униң һәрбир сессиясигә турақлиқ иштрак қилип келиватиду.

Гөһәрбүви ИСМАЙИЛҖАНОВА,
«Uiğur avazi»

Яркәнт тәвәсидинму ҚХА әзалиғиға дәсләпкиләрдин болуп пешқәдәм устаз, Панфилов наһийәсиниң Пәхрий граждини, узун жиллар Панфилов наһийәлик Уйғур этномәдәнийәт мәркизиниң рәиси болуп, уни оңушлуқ башқурған Реһимҗан Тохтахунов сайланди. У ҚХАниң жигирмә үч сессиясигә турақлиқ иштрак қилди. Бу күнләрдә һөрмәтлик дәм елишқа чиқсиму, Реһимҗан Имироғли җәмийәтлик ишларниң бешида болуватиду. Пешқәдәм устаз, миллий мәдәнийитимизниң җанкөйәри билән учришип, у қатнашқан сессиялар һәққидә йәнә бир қетим әсләп өттуқ.
– Шәхсән өзәм әшу Қазақстан хәлқи Ассамблеяси тәшкил қилинған 1995-жили униң әзаси болуп сайлинип, униң жигирмә үч сессиясигә қатнишиптимән. Һели есимдә, Ассамблеясиниң иккинчи сессиясидә маңа нутуқ сөзләшкә несип болди. У Алмутида өтүп, миллитимиз вәкиллиридин пән намзити, һели мәрһум Рабик Исмайилов иккимиз қатнашқан едуқ. Мән у чағда Панфилов наһийәлик Уйғур этномәдәнийәт мәркизиниң рәиси сүпитидә сөз елип, нутқумни ана тилимда баян қилған едим. Дәсләптә уйғур миллитидин төрт-бәшимизла ҚХА әзаси болған болсақ, бара-бара бу сәптики миллитимиз вәкиллириниң сани өсти. Биз шу чағдики Алмута вилайитидин делегатлар, дәсләп Талдиқорған шәһиридә баш қошуп, андин пайтәхткә атлинаттуқ. Һәммимиз бу сәпәргә һаяҗанлиниш билән үстүн кәйпият, көтирәңгү роһта алдираттуқ. Сессиялардин йеңи тәшәббуслар билән илһамлинип қайтаттуқ. Һәр қетим достлуғи билән бирлиги мүҗәссәм әлниң пәрзәнди болғанлиғим билән пәхирлиниш илкидә болаттим. Кейинки жилларда ҚХА сессиялири елимизниң пайтәхти Астана шәһиригә көчилириши түпәйли Разимәнлик сарийида өтүватиду. Биз һәр қетим яш пайтәхткә кәлгинимиздә йеңи-йеңи өзгиришләрниң гувачиси болдуқ, – дәйду һаяҗанланғанлиғини йошурмиған һалда.
Мана аридин жиллар өтүп, Қазақстан хәлқи Ассамблеясигә Панфилов наһийәсидин Жетису витлайәтлик Уйғур этномәдәнийәт мәркизи рәиси, Панфилов наһийәлик мәслиһәтниң депутати Турғанҗан Зайитов әза болди. Сессиягә шундақла Панфилов наһийәлик Уйғур этномәдәнийәт мәркизи Азат Гайитов, мәркәз йенидики Ханим-қизлар кеңишиниң рәиси Маһинур Аюпова меһман сүпитидә тәклип қилинди. Бу қетим өтидиған сессия елимиздики вәзийәткә мунасивәтлик онлайн-форматта уюштурулмақчи. Елимизниң бирқатар вилайәтлирини су бесип кетиши түпәйли пәвқуладдә әһвални баштин кәчүрүватқан регионларға ҚХА әзалири дәсләпкиләрдин болуп ярдәм көрсәтти. Реһимҗан Тохтахунов охшаш течлиқпәрвәр, достлуқпәрвәр жутдашлар бу иштин чәттә қалмиди. 

Панфилов наһийәси,
Жетису вилайити