• Хәйрихаһлиқ
• 06 Тамыз, 2015

Сахавәтлик мәхситидики ... өрүм

Мәлумки, һазир җай-җайларда өткән айниң ахирида Алмута шәһириниң жуқарқи қисмидики Қарығайли йезисида йүз бәргән тәбиий апәттин зәрдап чәккәнләргә һәртәрәплимә ярдәм көрситиливатиду. Бу изгү иштин уйғур җамаәтчилигиму чәттә қеливатқини йоқ. Мәсилән, йеқинда жут башқуруп һәм көплигән җәмийәтлик ишларниң бешида жүргән биртоп акилиримиз әйнә шу қериндашларға бираз ярдимини берип қайтти. Әлвәттә, бу су ташқини ақивитидин өй-маканидин айрилған адәмләргә һәм роһий вә мәнивий җәһәттин аз болсиму қол-қанат болғанлиқ болуп һесаплиниду. Тәкитләш лазимки, уларға яр-йөләк болуш шуниң биләнла аяқлашти дегәнлик әмәс. Көпчилик билидуки, һазир барлиқ уйғур жутлирида еғир әһвалда қалғанларға мәһәллиләрдики жигитбашлири вә җәмийәтлик ишларниң активистлири ианә топлаш билән шуғуллиниватиду. Йеқинда Талғир наһийәсиниң Бесағаш йезисида өткән той башлиништин илгири, мошу чарә тоғрисида тәрғибат ишлири жүргүзүлүвататти. Буниңдин хәвәр тапқан, йәни той хизмитидә болуватқан «Мирас» топиниң әзалири Руфат Аблизов вә Шаһмурат Бақиевлар (сүрәттә) иҗазәт сорап, көпчиликкә мундақ мураҗиәт қилди: — Бу изгү иштин бизму чәттә қалмайли, әгәр силәр рухсәт қилсаңлар, биз бүгүн мошу тойда чүшкән өрүмни, униң қанчилик болушидин қәтъий нәзәр, шу зәрдап чәккәнләргә бәрсәк, — дегән тәкливини бәрди. Топ әзалириниң мундақ алийҗанап тиләк-хаһишиға  апирин әйлигән көпчилик шу күни өрүмни адәттикидин көпирәк өриди. Буниңдин шундақ хуласә чиқиришқа болидуки, яшларда инсап-топиқ дегән нәрсә қалмиди, дәп ейтиш бәзидә орунсиз охшайду вә, әлвәттә, бу оғланларниң орунлуқ башланмиси һәқлиқ рәвиштә өзгиләргә үлгә-ибрәт болғуси.

Мәшүр САСИҚОВ.