• Әхбаратлар еқими
• 10 Желтоқсан, 2015

Регион алдидики вәзипиләр ениқ

Нурсултан Назарбаев Павлодар вилайитиниң һакими Қанат Бозымбаевни қобул қилди. Учришиш давамида Қанат Бозымбаев Дөләт рәһбирини регионниң мошу жилниң он бир ейидики иҗтимаий-ихтисадий тәрәққияти, шундақла алдики вақиттики вәзипиләр тоғрилиқ хәвәрдар қилди.Президент асасий дөләт программилирини сүпәтлик орунлашниң, кичик вә оттура тиҗарәтни, шундақла аһалиниң иҗтимаий җәһәттин аҗиз қатламлириниң қоллап-қувәтлинишиниң муһим екәнлигигә диққәтни җәлип қилди. Павлодар вилайитиниң һакими Индустрияләштүрүш хәритисини әмәлгә ашурушниң бүгүнки таңда регион тәрәққиятида муһим амил болуп һесаплинидиғанлиғини тәкитлиди. Җүмлидин иккинчи бәш жиллиқ даирисидә баһаси 1,2 триллион тәңгә болған 24 индустриал лайиһини ишқа қошуш планланған, униң даирисидә 6 миң иш орни вуҗутқа кәлтүрүлиду. Қанат Бозымбаев шундақла инвестицияләрни җәлип қилиш бойичә жүргүзүлүватқан иш тоғрилиқ әхбарат бәрди. Мәсилән, мошу жилниң 10 ейида бу көрсәткүчниң өсүши тәхминән 40 пайизни тәшкил қилди. Униңдин ташқири Павлодар вилайитиниң һакими Дөләт рәһбиригә мошу жилниң ахириғичә нефть коксини қиздуруш вә агрохимиялик мәһсулат ишләпчиқириш бойичә икки чоң карханини пайдилинишқа беришниң планлиниватқанлиғи тоғрилиқ доклад қилди.