• Әхбаратлар еқими
• 17 Наурыз, 2016

Тәзийә телеграммисини йоллиди

Нурсултан Назарбаев даңлиқ палван, әркин күрәш маһири Әбилсеит Айхановниң вапат болуши мунасивити билән мәрһумниң уруқ-туққанлириға вә йеқинлириға тәзийә телеграммисини йоллиди.Дөләт рәһбири тәзийә билдүрүп, исми ривайәткә айланған Әбилсеит Айхановниң Қазақстан хәлқиниң пәхри болғанлиғини тәкитлиди. «У әҗайип талант егиси болуп, чоң муваппәқийәтләрни қолға кәлтүргән, пәқәт илгәрки Кеңәш Иттипақидила әмәс, бәлки көплигән чоң хәлиқара мусабиқиларда ғалип чиққан еди. У өзиниң утуқлири билән хәлқимизниң роһини көтирип, яшларни спортниң мошу түри билән шуғуллинишқа дәвәт қилди. Нурғунлиған яшлар Әбилсеит Айхановтин үлгә елип, сағлам һаят тәризигә бәл бағлап, ғәйрәтлик вә күчлүк болуп өсүшкә тиришти. У устаз сүпитидә көплигән атақлиқ спортчиларни тәрбийиләп, қатарға қошти. Спорттики утуқлири үчүн пәхрий унванларға вә мукапатларға еришти», дейилиду телеграммида. Ахирида Нурсултан Назарбаев қазақстанлиқларниң Әбилсеит Айхановниң исмини вә әҗрини унтумайдиғанлиғини тәкитлиди. Қазақстан Президенти Анкара шәһиридә йүз бәргән террорлуқ һәрикәткә бағлиқ Түркия Президенти Реджеп Тайип Эрдоғанға тәзийә телеграммисини йоллиди. Телеграммида Қазақстан Президентиниң көплигән бегуна адәмләрниң һалак болушиға вә зәрдап чекишигә елип кәлгән паҗиәлик хәвәрни чоңқур қайғуруп қобул қилғанлиғи тәкитлиниду. «Силәрниң мәмликитиңларға хошна регионда турақсизлиқниң вә хәлиқара терроризмниң овҗ елишиға қаримай, Түркияниң заманивий ховуп-синақларға қарши күрәштә чидамлиқ көрситип, ички турақлиқни вә бехәтәрликни күчәйтидиғанлиғиға ишинимән. Хәлиқара терроризмни йоқитиш – дуния бирләшмиси алдида туруватқан әң муһим вәзипә дәп һесаплаймән», дейилиду телеграммида. Дөләт рәһбири Қазақстан хәлқиниң ХХ — XXI әсирниң әң хәтәрлик ховуплириға қарши болған күрәштә қериндаш түрк хәлқини қоллап-қувәтләйдиғанлиғини тәкитлиди. Ахирида Нурсултан Назарбаев Қазақстан хәлқиниң вә шәхсән өзиниң намидин Реджеп Тайип Эрдоғанға, һалак болғанларниң уруқ-туққанлири билән йеқинлириға, шундақла пүткүл Түркия хәлқигә тәзийә билдүрүп, зәрдәп чәккәнләрниң чапсанирақ сақийип кетишигә тиләкдашлиқ билдүрди.