• Хәйрихаһлиқ
• 09 Қаңтар, 2019

Балилар — келәчигимиз

Йеңи жил һарписида Әмгәкчиқазақ наһийәсиниң Тәшкәнсаз йезисида йеза округиниң һакими Эльвира Мәсүтова, Һезмәт Абдуллин намидики мәктәпниң мудири Алма Нәсирдинова вә йезиниң жигитбеши Әнвәр Баратовниң уюштуруши билән житим, йерим житим вә шундақла мүмкинчилиги чәкләнгән балилар үчүн арча мәйрими болуп өтти. Рашидәм РӘҺМАНОВА, «Уйғур авази» – Балилар – бизниң келәчигимиз. Хәйрихаһлиқ болса, инсанийлиқниң бәлгүси. Бүгүнки мәрасим йезимиздики көңли йерим балиларға азду-тола ярдәм қилиш мәхситидә уюштурулуватиду. Шундақла кечә-күндүз шу балиларға қарап, уларни асраватқан ата-аниларниң жүкини бираз йеникләтсәк, көңлини көтәрсәк дегән нийәттә болдуқ, – дәйду Алма Нәсирдинова. Устазларниң ейтишичә, Арча мәйримигә 40тин ошуқ бала тәклип қилинипту. Мәйрәм давамида Қиш бовай билән Қар қизи, кона һәм йеңи жил қәһриманлири болған Ишт һәм Тоңғуз вә башқиму арча қәһриманлири балиларниң көңлини көтәрди. Ахирида қәлби мәйрәмгә тәшна гөдәкләргә йеңижиллиқ соғилар тарқитилди. Унтулмас һиссиятлар илкигә бөләнгән ата-анилар бу чарә-тәдбирниң өтүшигә биркишилик һәссисини қошқан жигитбешиниң орунбасари Ғерипҗан Җеләмовқа, мәктәп устазлири Аидәм Ниязоваға, Әсем Әкбәроваға, Адилҗан Имировқа вә Адиләм Мутәллиповаға миннәтдарлиғини изһар қилип, ишлириға утуқ тилиди. Әмгәкчиқазақ наһийәси.