• Хәйрихаһлиқ
• 20 Ақпан, 2019

Қарасулуқлар дәсләпкиләрдин болди

Мәшүр САСИҚОВ, «Уйғур авази» Алмутиниң «Қарасу» мәһәллисидә яшайдиған уйғурларниң сани унчивала көп әмәс. Шундиму, башқа милләтләр көпләп истиқамәт қилидиған микрорайонда яшаватқанлиғиға қаримай, миллийлигини сақлиған һалда, паалийәтчанлиғи билән көзгә чүшүватиду. Мәсилән, улар йеқинда, йәни 4-февраль күнигә қариған кечиси Астана шәһиридә йүз бәргән паҗиә түпәйли бәш пәрзәндидин айрилған аилигә 102 миң тәңгә ярдәм пулини әвәтти. – Әлвәттә, биз бу ярдимимиз билән бәш алтундәк пәрзәндидин җуда болған ата-аниниң көйүк отини басалмаймиз, – дәйду Қарасу мәһәллисиниң баш жигитбеши Махмут Мәңсүров. – Бирақ, пүтүн әл-жут тушма-туштин қолидин кәлгинини қиливатса, бизниң чәттә турғинимиз әқилгә сиғмас. Шуңлашқа мәһәллиниң һәтта аддий турғунлири өзара алақилишип, аз күн ичидә топлиған ианимизни пайтәхткә әвәтивәттуқ. У яқтин «алдуқ» дегән хәвәрму кәлди. Һәқиқәтәнму, у паҗиәдин учур тапқан һәрқайсимиз чоң пәрзәнди әндила он иккигә толған қулунлиридин айрилған ата-аниға сәвирлик тилидуқ. Тилсиз йеға ақивитидин зәрдап чекиватқанлар тоғрилиқ нурғун аңлиған болсақму, бир аилигә мунчивала қиямәт салғанлиғини ядимизға алалмай, тепчәкләп кәткинимизму бар. Қолида барлар имканийитиниң йәткиничә ярдимини қиливатса, бу вақиәдин кейин һөкүмәт орунлиридикиләрму иссиқ бөлмиләрдин өзлирини дәрһал сиртқа атти. Һәтта хизмитидин айрилған әмәлдарларму бар. Әйнә шу һәммимизни һәләйкүмгә салған бу паҗиәгә қарасулуқлар дәсләпкиләрдин болуп қол учини сунуп, өзлириниң инақ-иҗиллиғини йәнә бир қетим испатлиди. Бу йәрдә улар пәқәт мошундақ қайғулуқ әһваллардила «инақ» екән дегән чүшәнчә пәйда болмаслиғи керәк. Чүнки уларниң шәһәр вә наһийә даирисидә өткүзүлүватқан барлиқ мәдәний чарә-тәдбирләргә паал арилишип, тәминати төвән жутдашлириниң хиҗалитидин чиқиватқанлиғидин хәвиримиз бар. Мәсилән, өткән жили Норуз мәйримини кәң даиридә, йәни миллий әнъәнилиримиз асасида өткүзүш вә шу мәйрәм мунасивити билән шәһәрдики накалар өйигә ярдәм қилиш, еғир ағриққа дучар болған бирнәччә адәмниң дора-дәрмигини елип бәргәнлиги сөзүмизниң ярқин испатидур. Пурсәттин пайдилинип, тәшәббукарлиқ көрситип келиватқан жут активистлириниң исим-шәрипилирини атап өтүшни мувапиқ көрдуқ. Жуттики Ақсақаллар кеңишиниң рәиси Замандин Турдиев башлиған Коммунар Баратов, Әбәйдуллам Қурбанов, Рәхимҗан Розиев, Әркин Муһәмәтов, Халмурат Аюпов, Җалалдин Азнибақиев вә Абдурешит Илиев охшаш акилар жутниң иши десә, ичиватқан чейини ташлайдиғанлардин. Әнди Ханим-қизлар кеңишиниң рәиси Фатима Лохмановаға һәмра болуп, у яқниң қолиға қол, путиға пут болуватқан Руқийәм Шакирова, Зулфия Султанова, Гүлбанум Идрисова, Ләйлихан Йүсүпова вә Гүлбанум Амансопиеваниң ишлиридин жут әһли дайим рази.