• Әхбаратлар еқими
• 18 Наурыз, 2021

Йол апитидин бир қиз вапат болди

2-март күни Әмгәкчиқазақ наһийәсиниң Қорам йезисида йүз бәргән йол апити вақиәси һәққидә әхбарат Иҗтимаий торлар арқилиқ чақмақ тезлигидә елимизниң җай-җайлириға тарап, көпчиликниң наразилиғини туғдурди. Әскә селип өтсәк, у күни мәзкүр йезиниң турғуни мәс һаләттә өзиниң автомашиниси билән 8-9 яштики төрт қизни урувәткән еди. 

Рашидәм РӘҺМАНОВА,
«Уйғур авази»

Бу күни қизлар мәктәптин чиқип өйигә қайтқан. Улар йезиниң чоң кочисиниң четидә кетип баратти. Күтүлмигән йәрдин бир автомашина улар тәрәпкә қарап маңди. Қизлар һодуққинидин немә қилишини билмәй қалған еди. Көзни жумуп ачқичә төрт қизниң үчи автомашининиң астида қалди. Бәхтигә яриша, төртинчиси өзини чәткә елип үлгәрди. Ақивәттә, һайдиғучи медицинилиқ сәгәкханиға солинип, зәрдап чәккән қизлар Челәк йезисидики мәркизий ағриқханисиға йәткүзүлди. Мәлум болушичә, бир қизниң пут-қоллири сунған, амма униң әһвали һәр һалда яхши болса, икки қиз әс-һошсиз реанимация бөлүмигә ятқузулди. Вәзийәтниң мурәккәплигигә бенаән Алмутидин дохтурлар чақиртилди. 11 күндин кейин әһвали еғир қизларниң бири әс-һошиға кәлмәй, вапат болди. 
Вақиә йүз бәргәндин етиварән һайдиғучиниң үстидин җинаий иш қозғалди. Тәргәв жәриянини Қазақстан Җумһурийитиниң Президенти Қасым-Жомарт Тоқаев өз назаритигә алди.

Әмгәкчиқазақ наһийәси.