• Әхбаратлар еқими
• 18 Наурыз, 2021

Бәрикәт булиғи соғулмиғай

Шәмшидин АЮПОВ, 
«Уйғур авази»

Алмута шәһиридә истиқамәт қиливатқан қирғизсайлиқ яшлар интайин өм, бир-бири билән қувалишип, урпи-адәтлиримизни, миллий әнъәнилиримизни, диний етиқатлиримизни сақлап, үч-төрт жилдин буян бир мәшрәп әһли болуп келиватиду. Жигирмигә йеқин уйғур яшлири җәм болған ушбу мәшрәпниң жигитбеши Дилшат Нурахунов мәшрәп әһли арисидики өзара инақлиқ билән бирликни мустәһкәмләш охшаш ишлар билән җиддий шуғуллинип кәлмәктә. «Уйғур авази» гезитиға муштири топлаш йолидиму мәхсәтчанлиқ билән иш елип бериватиду. Умумән, у өзигә жүкләнгән вәзипини чоң җавапкәрлик турғусида атқуруп, көплигән изгү һәм соваплиқ ишларниң бәҗирилишигә дәвәтчи болуп, урпи-адәт, рәсим-қаидиләрниң йолға қоюлушиға, қирғизсайлиқ яшларни умумий бир мәхсәткә сәпәрвәр қилишқа салмақлиқ үлүшини қошуп кәлмәктә. 
Мәшрәп әһлиниң тилға алса еғиз толтуруп ейтқидәк соваплиқ ишлири, киндик қени тамған Қирғизсай жутиниң бәрикитини тәминләватқан чарә-тәдбирлири аз әмәс. Мошу жилниң февраль ейида мәшрәп әзалириниң тәшәббуси билән башқа жутларға үлгә боларлиқ йәнә бир изгү иш әмәлгә ашурулди. Җәнубий пайтәхттә истиқамәт қиливатқан 25 — 45 яш арилиғидики қирғизсайлиқ яшлар «Восток » кафесиға жиғилип, новәттики мәшривини өткүзди. Бу чарә-тәдбирни өткүзүштики мәхсәт ­­­­– яш әвлат арисидики достлуқ, бирлик вә инақлиқни мустәһкәмләш, туғулған жутиға яр-йөләк болуш, чоңларни һөрмәтләп, кичикләргә иззәт көрситиш, урпи-адәтләр билән ана тилини сақлап, яшларни миллий роһта тәрбийиләштин ибарәт. Шу күни баш қошқан жигирмигә йеқин яш пәқәт көңүл көтиришнила ойлимай, кәлгүсидә атқуридиған соваплиқ ишлирини мәслиһәтлишип, өзара пикирләшти. Мәшрәп беги ушбу баш қошушниң асасий мәхсәт-муддиасини чүшәндүргәч, яшларға миллитимизгә хас урпи-адәтлиримиз билән рәсим-йосунлиримиз тоғрилиқ қисқичә чүшәнчә берип, уларниң чоң әвлатниң мунасип избасарлиридин, жутиниң бәрикитини тәминләйдиған соваплиқ ишларниң тәшәббускарлиридин болушқа чақирди. Өз новитидә мәшрәп әзалири сөз болуватқан мәсилиләр әтрапида өз ой-пикирлири билән ортақлишип, туғулған жутиниң аброй-шәнини көтириш үчүн дайим өмлүшүп һәрикәт қилидиғанлиғиға вәдә беришти.
— Биз Алмута шәһиридә истиқамәт қиливатқан қирғизсайлиқ яшлардин бәк миннәтдармиз, — дәйду Уйғур наһийәси Қирғизсай йезисиниң жигитбеши Адилҗан Һәмраев билән жут мөтивәрлири Нурәхмәт Нуралиев, Мунәвәр Әкбәров вә Нәзәр Һебибуллаев. – Улар өзлири учум болған жути —Қирғизсайни һечқачан унтуған әмәс. Дайим һалимиздин хәвәр елип, ярдәм қолини сунуп келиватиду. Жут өмлүги билән яшлиримизниң мундақ инақ-иттипақлиғиниң һули мәһәллә бәрпа болған дәсләпки жиллирила қелиплашқан. Жут яшлириниң бизниң хошаллиғимиз билән бөлүшүп, қайғумизға ортақлишип келиватқиниға түмән тазим. Илаһим, жутумиздики мошу бәрикәт булиғи һечқачан соғулмиғай! 
Хуласә шуки, яшлиримизда вәтәнгә, әл-жутиға муһәббәт, меһир-шәпқәт охшаш инсаний хисләтләрни ойғитишқа, миллий роһни көтиришкә көңүл бөлидиған мошу хилдики соваплиқ чарә-тәдбирләр уйғурлар зич яшаватқан башқиму мәһәллиләрдә пат-пат өткүзүлүп турса, нур үстигә нур болар еди. Мүмкин немә қиларини билмәй қаймуқуп жүргән яшлиримизниңму ата-бовилиримиздин давамлишип келиватқан урпи-адәтлиримиз билән рәсим-йосунлиримизға һөрмәт билән қарап, миллий мәдәнийитимизгә болған иззәт-еһтирами ашатти. Муһими, яшлиримизда ана тилини қәдирләшкә дегән ихлас күчәйгән болар еди. Әйнә шу чағда диний мунасивәтлиримизму чечилматти, дилму бузулматти һәм суслишишқа йүзләнгән миллий роһму күчийәтти.