• Әхбаратлар еқими
• 18 Наурыз, 2021

Алмутиға киридиған җайларда 19 экопост ишләйду

“Иш бабидики сәпирим давамида Ғулҗа йолида орнитилған йеңи экологиялик постни көздин кәчүрдүм. Бу йәрдә көпкомпонентлиқ газоанализаторларниң ярдими арқилиқ бензинда вә газда ишләйдиған автомобильларниң һаваға чиқиридиған зиянлиқ маддилирини тәкшүрәйду”, дәп язди өзиниң аккуантида Алмута шәһириниң һакими Бахытжан Сағинтаев.
Униң мәлуматлиричә, шәһәргә киридиған җайларда барлиғи болуп 19 экопост ишләйду. Уларниң дәсләпки иккиси Ғулҗа йолидики вә Бухтарма кочилиридики экопостлар пат-йеқинқи күнләрдә ишләшкә башлайду. Алдин-ала тәкшүрүш нәтиҗисигә мувапиқ 5 миң йеник вә бир миңдин ошуқ жүк машиниси һаваға зиянлиқ маддиларни көп ташлайдиғанлиғи ениқланди.
Пат-йеқинқи вақитта газоанализаторлар вә ис тәкшүрүш аппаратлири билән җабдулған көчмә экологиялик патрульлар паалийитини башлайду. Буниңдин ташқири барлиқ экопостларда һаваниң сүпитини өлчәйдиған станцияләр орнитилди. Улар мәлуматларни онлайн-картида вә LED-дисплатларда көрситип туриду.
“Мәзкүр чариләр шәһәрниң экологиясини яхшилашқа вә һавани паскинилаштуридиған автотранспортларниң сепини азайтишқа қаритилған”, дәп тәкитләйду һаким.
Лайиһә Алмута шәһири экологиясиниң әһвали тоғрилиқ барлиқ мәлуматларни бирләштүридиған җошқунлуқ платформа болуп һесаплиниду. Мониторинг станциялири онлайн-режимда һәр 20 минутта һаваниң әһвали һәққидә әхбарат берип туриду. Станция һавани паскинилаштуруватқан маддиларниң көләмини, шундақла нәмлик параметрини, қисимини, температурисини, шамалниң йөнилишибилән илдамлиғини өлчәйду.
Шәһәр һакими Б.Сағинтаевниң тапшурмиси бойичә әмәлгә ашурулған лайиһиниң мәхсити – аддий гражданларға, экспортларға вә мутәхәссисләргә онлайн-форматида мәлуматларни бериш болуп һесаплиниду. Буниңдин ташқири мәлуматлар базиси шәкилләндүрүлиду. У мәлуматларни тәһлил қилиш асасида һава сүпитиниң өзгиришини вә башқиму параметрларни тәхмин қилишқа имканийәт яритиду.