• Әхбаратлар еқими
• 03 Маусым, 2021

Елбасы ядикарлиқ орнитиш тоғрилиқ

Гезитимизниң өткән санида «Түркстан – Түркий дунияниң роһий пайтәхти: интеграция вә һәмкарлиқ истиқбали» мавзусида хәлиқара онлайн-конференция өтүп, униңда ТҮРКСОЙ баш кативиниң орунбасари Билал Чакыджиниң Түркстан шәһиридә Елбасыға ядикарлиқ орнитиш тәкливини бәргәнлиги тоғрилиқ әхбарат елан қилинған еди. 
Әнди йеқинда Тунҗа Президентниң мәтбуат кативи Айдос Үкибай бу тәклипни Нурсултан Назарбаевниң қандақ қобул қилғанлиғи тоғрилиқ ейтип бәрди.
 – Елбасы, мошу кәмгичә оттуриға қоюлған башқа идеяләр охшаш, бу идеяниму қоллимиди. Униңға ядикарлиқларни орнитишқа, мемарчилиқ объектлириниң намлирини өзгәртишкә бағлиқ мундақ «соғилар», әгәр уларни җай-җайлардики әмәлдарлар уюштуруватқан болса, мутлақ яқмайду. Нурсултан Әбишоғли өзигә мундақ диққәт-етиварниң керәк әмәслиги тоғрилиқ илгириму бирнәччә қетим билдүргән еди. Бәзидә айрим адәмләр билип туруп, шундақ әхбарат ваң-чуңини уюштуруватамдекин, дегән ойму пәйда болиду. Университет вә әқлий    мәктәпләр – Тунҗа Президент йеңи лайиһиләргә өз исмини беришкә келишкән тарихтики бирдин-бир әһвалдур.
Пайтәхт Күни, Тунҗа Президент Күни вә башқа сәнәләр – бу һәммидин авал адәмләр, мәмликәт гражданлири үчүн мәйрәм. Бийил Қазақстан өз мустәқиллигиниң 30 жиллиғини нишанлайду. Шуңлашқа ядикарлиқлар вә намларниң өзгәртилиши әмәс, бәлки бирликни, турақлиқлиқни сақлап қелишқа, хәлқимизниң хатирҗәмлигини вә гүллинишини тәминләшкә қаритилған системилиқ чариләрниң әмәлгә ашурулуши биз үчүн асасий соға болуши керәк. Нурсултан Назарбаевниң тәкитлишичә, парлақ келәчәккә интиливатқан илғар пикирлик яшлар, заманивий пайтәхти бар гүллиниватқан Қазақстан, өз Вәтинини чин дили билән сөйидиған гражданлар – униң әмгигигә берилгән әң яхши соға болуп һесаплиниду, – дәп тәкитлиди Айдос Үкибай.