• Әхбаратлар еқими
• 03 Маусым, 2021

Тәшкилат рәһбири билән учрашти 

Қазақстан Президенти Қасым-Жомарт Тоқаев видеоконференцалақә тәртиптә Дуниявий сода тәшкилатиниң Баш мудири Нгози Оконджо-Ивеала билән учрашти.
 Музакириләр вақтида Қазақстан билән Дуниявий сода тәшкилати оттурисида өзара һәрикәтни күчәйтиш истиқбали қаралди. Дөләт рәһбири Нгози Оконджо-Ивеалани йеқинда Дуниявий сода тәшкилатиниң рәһбири лавазимиға сайлиниши билән сәмимий тәбрикләп, Тәшкилат билән қоюқ һәмкарлиқниң мәмликитимизниң муһим йөнилишлириниң бири болуп һесаплинидиғанлиғини тәкитлиди.
 Учришишта Дуниявий сода тәшкилатиниң 12-Министрлар конференциясигә тәйярлиқ көрүш мәсилилиригә алаһидә диққәт бөлүнди.
 – Бийил ноябрьниң ахири – декабрьниң бешида өтидиған 12-Министрлар конференциясигә рәислик қилиш – биз үчүн чоң шәрәп. Мән Сизни Қазақстан Һөкүмитиниң бирләшкән чарә-тәдбиримизниң мәзмун вә тәшкилий җәһәттин барлиқ мәсилиләрни ишләп чиқиш үчүн Дуниявий сода тәшкилатиниң Кативати билән паал өзара һәрикәттә болидиғанлиғиға ишәндүримән, – деди Қасым-Жомарт Тоқаев.
 Президент Қазақстанниң көптәрәплимилик сода системисиниң паал тәрәпдари сүпитидә Конференцияниң җиддий нәтиҗиләргә елип келишигә мәнпийәтдар екәнлигини тәкитлиди. У өз тәрипидин күн тәртивиниң барлиқ һәл қилинмиған мәсилилириниң муһакимә қилинишиға чоң һәссә қошушқа тәйяр екәнлигини тәкитлиди.
 Дөләт рәһбири шундақла Дуниявий сода тәшкилатиниң Баш мудирини таҗсиман вирусқа қарши күришиш бойичә Қазақстан тәрипидин көрүлүватқан чариләрдин хәвәрдар қилди. Сөһбәтдашлар пандемиягә қарши туруш бойичә миқияслиқ, шу җүмлидин вакцинилар вә медицинилиқ җабдуқлар билән умумйүзлүк тәминләшкә қаритилған күч-қувәтни муһакимә қилди.
 Қасым-Жомарт Тоқаев Дуниявий сода тәшкилати вакцина чиқириватқан Тәшкилатқа әза дөләтләр вә әрзән вакциниға муһтаҗ әлләр билән Баш мудирниң рәһбәрлигидә әмәлгә ашурулуватқан конструктив диалогни толуқ қоллап-қувәтләйдиғанлиғини билдүрди.
 – Биз Дуниявий сода тәшкилати муһим медицина товарлириниң үзлүксиз вә вакцининиң адаләтлик йәткүзүлүшидә асасий роль ойниши керәк, дәп һесаплаймиз. Шуниңға мунасивәтлик мән Һөкүмәткә бизниң Сода вә саламәтликни сақлаш саһалиридики тәшәббусимизға мунасивәтлик мәвқәмизни ишләп чиқишни, җүмлидин 12-Министрлар конференциясиниң тегишлик қарарини тәйярлашқа конструктив һәссә қошушни тапшурдум, – дәп тәкитлиди Қасым-Жомарт Тоқаев.
 Өз новитидә Нгози Оконджо-Ивеала Қазақстанниң COVID-19 инфекциясигә қарши күришишкә сәрип қиливатқан күч-қувитини жуқури баһалиди вә QazVac вирусқа қарши ички препаратниң чиқирилиши билән тәбриклиди.
 Дуниявий сода тәшкилатиниң Баш мудири алдики Министрлар конференциясигә тәйярлиқ көрүш тоғрилиқ гәп қилип, Қасым-Жомарт Тоқаевқа Қазақстанниң мәзкүр конференция даирисидики бизнес-форумға иштрак қилиш имканийитини қарап чиқишни ейтқач, шәхсән өзини Женевида өтидиған конференциягә қатнишишқа тәклип қилди.
 Дөләт рәһбири учришиш ахирида Нгози Оконджо-Ивеалани өзи үчүн қолайлиқ вақитта Қазақстанға сәпәр билән келишкә тәклип қилди.