• Әхбаратлар еқими
• 10 Маусым, 2021

Тәдбирчан ханим-қизлар

Панфилов наһийәсидә тиҗарәт билән шуғуллиниватқан ханим-қизлар аз әмәс. Улар наһийәлик Ишбиләрмән ханим-қизлар кеңишидә баш қошуп, алдин-ала түзүлгән реҗилири асасида иш елип бериватиду. Ишбиләрмән Ханим-қизлар кеңишини Панфилов наһийәсиниң Пәхрий граждини Сүрийәм Һезимова башқуриду. Йеза егилиги, болупму деханчилиқ, чарвичилиқ,  оттура вә кичик тиҗарәттә өзлири синап келиватқан ханимлар давамлиқ хәйрихаһлиқ акцияләрни уюштуруп туриду. Йеқинда улар йәнә бир қетим наһийәни арилап, йеза-авуллардики тәминати начар көпбалилиқ аилиләр билән баққучисидин айрилған җанларға хәйрихаһлиқ ярдимини көрсәтти.

Гөһәрбүви ИСМАЙИЛҖАНОВА
 «Уйғур авази» 

Наһийәлик ишбиләрмән ханим-қизлар һәрхил кәсип егилири. Бир сөз билән ейтқанда, һәрхил саһаларда әрләрдин һеч қелишмай наһийәниң иҗтимаий-ихтисадий тәрәққиятиға тегишлик һәссилирини қошуватқан җанлар. Улар тапқининиң мәлум қисмини хәйри-еһсанлиқ ишларға сәрип қилишни унтуған әмәс. 
 – Ишбиләрмән ханим-қизлар кеңиши әзалири жилиға төрт-бәш қетим хәйрихаһлиқ акциядә баш қошимиз. Бу жили Роза-рамзан ейида пандемия тәсиридин баш қошушлар мәнъий қилинғачқа, 150 аилигә иптарлиқ тарқаттуқ. 
 Әнди һәр жили 1-июньда болса көпбалилиқ, баққучисидин айрилған, мүмкинчилиги чәкләнгән балилар билән әдәбий-музыкилиқ кәчләрни уюштураттуқ. Елимизнила әмәс, дунияни вәһимигә селиватқан таҗсиман вирус тәсиридин икки жил болди, биз уларниң өйлиригә берип, турмуш әһвали билән тонушуп, тегишлик ярдимимизни көрситишни тоғра көрдуқ. Шуңа мәзкүр кеңәш әзалири бу қетим оттуз аилигә қол учимизни сунуш үчүн атландуқ. Кеңәш әзалири Һурийәт Семәтова, Улбосын Аманбаева, Балшекер Жапишева, Ләззәт Чойғараева, Маһинур Аюпова, Меруерт Оханова, Роза Истай, Кәмшат Молдаханова, Айгүл Қожасултанова, Роза Бектемисова, Несихан Жазылбекова, Роза Хайбуллина, Бақытгүл Мырзахметова қатарлиқ ишбиләрмәнләр балиларға оюнчуқ, озуқ-түлүк ианә қилип көңлини алди, — дәйду Сүрийәм Һезимова.
 Қазақстанда кичик вә оттура тиҗарәтни тәрәққий әткүзүшкә алаһидә көңүл бөлүнүватиду. Елимизниң Тунҗа Президенти — Елбасы Нурсултан Назарбаев билән Президент Қасым-Жомарт Тоқаев бу мәсилини диққәт мәркизидин чүшәрмәй, тиҗарәтниң кәң қанат йейип, риваҗлиниши үчүн қолайлиқ шараитниң яритилишиға чоң әһмийәт берип кәлмәктә. 

Панфилов наһийәси.