• Әхбаратлар еқими
• 25 Қараша, 2021

Лавазимини йәттә жилдин артуқ егиләлмәйду

Билим бериш системисида мәктәп, колледж вә балилар бағчилириниң мудирлирини алмаштуруп туруш институти пәйда болди.
Билим бериш саһасида 10 миңдин ошуқ дөләт тәшкилати бар. Көплигән рәһбәрләр чәксиз әмгәк келишимигә егә. Уларниң арисида бир орунда 10–15 жилдин ошуқ вақит ишләватқанлар аз әмәс.
– Әлвәттә, уларниң арисида өзиниң ишини яхши билидиған вә мәктәпниң, колледжниң, мәктәп йешиғичә яки қошумчә билим беридиған тәшкилатларниң тәрәққиятиға салмақлиқ үлүш қошқан рәһбәрләр аз әмәс. Лекин шуниму етирап қилиш керәкки, мәсилән, бир орунни 10–15 жил егиләп, тәшәббускарлиқни вә тәрәққий етиш хаһишини йоқатқанларму бар, – дәп һесаплайду министр Асхат Аймағамбетов.
Униң сөзичә, әгәр рәһбәр бир билим бериш тәшкилатини узақ вақит башқурса, бу ишта йеңи йөнилишләрниң йоқилишиға елип келиду, у барлиқ камчилиқлири билән моҗут вәзийәткә адәтлиниду. Иш орнини өзгәртиш өзгиришләрни җарий қилишқа вә рәһбәрлик нәтиҗидарлиғини ашурушқа мүмкинчилик бериду. 
Дөләт тәшкилатлириниң биринчи рәһбәрлирини алмаштуруп туруш қаидиси Қазақстан Җумһурийитиниң Әдлийә министрлигидә тиркәлди.
Биринчидин, иш орнини алмаштурушқа бир тәшкилатта 4 яки 7 жилдин ошуқ вақит ишлигән рәһбәрләр чүшиду. Мошуниң өзидә мәзкүр билим бериш тәшкилатиниң рәһбири лавазимиға тайинланған күндин тартип егиләватқан лавазимида төрт жил болған рәһбәр орнини алмаштуруш тәкливидин баш тартиши мүмкин вә күчкә егә әмгәк келишими даирисидә өз ишини давамлаштуралайду. Әгәр у мәзкүр билим бериш тәшкилатида йәттә жилдин ошуқ вақит ишләватқан болса, у мәҗбурий түрдә орнини алмаштуруши тегиш.
Иккинчидин, орун алмаштурушни жүргүзүшниң новәттики шәртлири көздә тутулған:
Иш орнини алмаштурушни вилайәт вә җумһурийәт әһмийитидики шәһәрләрниң билим бериш башқармиси жүргүзиду; иш орнини алмаштуруш бир аһалилиқ пункт даирисидә жүргүзүлиду; алмаштуруш бир типтики тәшкилат рәһбәрлири оттурисида жүргүзүлиду; алмаштуруш вақтида биринчи рәһбәрләрниң квалификациялик категорияси, шундақ екән, униң үчүн алидиған айлиқ маашму униң қәрәли аяқлашқичә сақлиниду.
Алмаштуруш системисиниң нәтиҗидарлиқ ишлиши вә мәзкүр қаидиләр җай-җайларда яхши әмәлгә ешиши үчүн министрлик мониторинг жүргүзидиған болиду.