• Әхбаратлар еқими
• 13 Қаңтар, 2022

Әмгигидин жут рази

Кичикдеханлиқ Мунира Мейдиновани (сүрәттә оңда) көптин бери яхши тонуймән. Һәр қетим учрашқинимизда көрмигили көп болған туққинидәк иллиқ қарши алиду. Гәрчә тонушқинимизға техи бирқанчә жилниң йүзи болсиму, мәнму уни бөләкчә йеқин көримән. Кичик Деханға йолум чүшсә, биринчи новәттә Мунира һәдини издәйдиған болдум. 

Сабирәм ӘНВӘРОВА
«Уйғур авази»
 
Башта ейтқинимдәк, Мунира һәдә билән иш бабида тонуштуқ. У Кичик Дехан йезилиқ клубида ишләйду. Жутниң мәдәнийитини тәрәққий әткүзүшкә зор үлүш қошуп, хәлиқниң хизмитидә жүргән инсан. Әйтәвир, қачанла қарисаң, җәмийәтлик ишларниң беши-қешида жүргән. Мунира һәдә билән йеңидин тонушқанда, униң өз кәспигә җан-дили билән берилгән, бир ишни қолға алса, гүлини чиқирип, хизмитини жуқури җавапкәрлик билән атқуридиған мутәхәссис екәнлигини байқиған едим. Бу бирқанчә жилдин буян униң көплигән утуқлириға ортақлишип, һәқиқәтән кәспини сөйгән мутәхәссис екәнлигигә көзүм йәтмәктә. 
 Башқисини қоюп, пәқәт ахирқи утуғиға тохтилар болсам, жил ахирида у Мустәқиллигимизниң оттуз жиллиғиға бағлиқ өткүзүлгән вилайәтлик «Ауылым – алтын бесігім» намлиқ йезилиқ Мәдәнийәт өйлири, китапханилар вә мирасгаһлар арисидики конкурсқа қатнишип, «Үздік» дәп етирап қилинди. Мошу йәрдә мәзкүр конкурсқа Уйғур наһийәсидин пәқәт Кичик Дехан йезилиқ клубиниң қатнашқанлиғини тәкитләп өтүшкә әрзийду. Бу утуқ, биринчидин, Мунира һәдиниң тиришчанлиғи вә әмгәксөйгүчлүгиниң нәтиҗисидур. 
 Йеңи жил алдида Талдиқорған шәһиригә берип, әмгигигә лайиқ мукапат билән тәғдирлинип қайтқан қәһриманимизни жутдашлири апирин ейтип күтүвалди. Өз новитидә, наһийә һакими Шөһрәт Нурахуновму Мунира һәдиниң утуғини алаһидә тилға елип, һөрмәт көрсәтти. 
 Миллий мәдәнийитимиз, сәнъитимиз, урпи-адәтлиримизни риваҗландуруш, хәлиқләр достлуғини мустәһкәмләш йолида аянмай тәр төкүп, жутиниңла әмәс, наһийәниниң абройини ашуруп хизмәт қиливатқан Мунира һәдә Мейдинова Мустәққилигимизниң оттуз жиллиғиға мунасивәтлик Җумһурийәтлик Уйғур этномәдәнийәт мәркизиниң рәиси Шаһимәрдан Нурумовниң Пәхрий ярлиғи биләнму тәғдирләнгән еди. 
 Жил йәкүнидики қош мукапат – униң бир жиллиқ әмәс, жигирмә алтә жиллиқ мәшәқитиниң йемишидур. 1990-жили Чоң Ақсудин Кичик Дехан йезисиға келин болуп чүшкән Мунира һәдә 1995-жилдин бүгүнки күнгә қәдәр мәдәнийәт саһасида ишләватиду. Униң колхозлар тариғанда, йәни 1996-жилдин 2007-жилғичә һөкүмәттин бир тийин алмисиму, йезилиқ клубтики вәзиписидин қол үзмәй, жутниң хизмитидә болғанлиғини, толуқ уприған клубни бүгүнки күнгә йәткүзүш үчүн сиңдүргән беминнәт әҗрини жутдашлири жуқури баһалайду. Мана шундақ тинимсиз әмгәкниң нәтиҗисидә Кичик Дехан йезилиқ клубиға һөкүмәт тәрипидин көңүл бөлүнүп, ениғирағи, бултур  паровой қоюлуп, ишик-деризилири йеңилинип, көмүр қоймиси ясалди. Теми өрүләй дегән клуб имарити җөндәштин өтүп, пайдилинишқа ярамлиқ һаләткә кәлтүрүлди. Бу ишларниң әмәлгә ашурулушида Мунира һәдиниң иқбали чоң. 
 Қиш күнлири униң клубқа өзи от қалап, конириған бенани тазилап, йоқтин бар ясап хизмәт қилғанлиғини һечким йоққа чиқармайду. Қисқиси, қолида бар мүмкинчиликләрдин пайдилинип һәр мәйрәмдә жутта чоң чарә-тәдбирләрни өткүзүп, ярдәмгә муһтаҗ җанларға имканийитиниң яр бәргиничә ярдәм көрситишни адәткә айландурған Мунира һәдә Мейдинова, қайси қиридин елип язсақму, әмгиги махташқа әрзийду. Йолдиши Абдуллинниң вапатидин кейин икки оғул, бир қизини заманға лайиқ тәрбийиләп, қатарға қошқан батур ана бу күнләрдә үч нәврә қучқан бәхитлик момиға айланди. Шундақла у «Уйғур авази» десә, ичкән ешини йәрдә қойидиған бизниң турақлиқ оқурмәнимиз һәм җанкөйәримиздур. Дәрһәқиқәт, «Мән үчүн әң чоң мукапат жутдашлиримниң разилиғи, жутниң бирлиги һәм течлиғи» дәйду  мақалимиз қәһримани.