• Әхбаратлар еқими
• 13 Қаңтар, 2022

Мунасиплар мукапатланди

Панфилов наһийәлик Уйғур этномәдәнийәт мәркизи мустәқил елимизниң ихтисади билән мәдәнийитини тәрәққий әткүзүштә, аһалини иҗтимаий җәһәттин қоллап-қувәтләштә, туғулуп өскән жутиниң тәрәққияти үчүн биркишилик төһписини қошуватқанларниң әмгигини мунасип баһалап, һөрмәт билдүрүшни әнъәнигә айландурған. Өткән жилниң ахирқи күнлири Яркәнт шәһиридики «Сүбһиназ» кафесида болуп өткән Қазақстан Җумһурийити Мустәқиллигиниң 30 жиллиқ мәрикисигә беғишланған чарә сөзүмизгә испат болалайду. 

Гөһәрбүви ИСМАЙИЛҖАНОВА,
«Уйғур авази»

 Мәйрәмлик баш қошушқа Яркәнт алий гуманитарлиқ техникилиқ колледжиниң оқутқучиси, Қазақстан Язғучилар иттипақиниң әзаси Молутҗан Тохтахунов риясәтчилик қилди.
Сөз новитини алған наһийәлик Уйғур этномәдәнийәт мәркизиниң рәиси Азат Гайитов елимиз Президентиниң Мәктүбидики көрсәтмә тапшурмиларни, дөләт программилирини әмәлгә ашурушта төһписини қошуп, мәрикилик жилда дөләтлик мукапатларға егә болғанларни сәһнә төригә тәклип қилип, көпчиликкә тонуштурди. Уларниң арисида “Панфилов наһийәсиниң  Пәхрий  граждани” намиға сазавәр болғанларни, «Шапағат» медали, «Еңбек даңқы» төшбәлгүси, «Қазақстан Тәуелсіздігіне – 30 жыл» медали, ҖУЭМ тәсис қилған «Сахавәт» медали, «Бейбітшілік әлемі» Хәлиқара қазақ иҗадий бирләшмисиниң медальлири билән тәғдирләнгәнләрни көпчилик қизғин қарши алди. 
Бу күни һаятиниң 85-даваниға көтирилгән пешқәдәм устаз, Қазақстан маарип әлачиси Майминәм Имәрова, барлиқ аңлиқ һаятида китапханичи болуп ишләп, бу күнләрдә 80 яшлиқ тәвәллудини қарши еливатқан әмгәк ветерани Хасийәтбүви Әлаева билән миллий мәтбуатимизниң җанкөйәри, фотомухбир Турсунмәһәмәт Мәшүровни 65 яшлиғи билән тәбриклиди. Шундақла 60 яшлиқ тәвәллуд егилири пешқәдәм устаз Сүбһидин Мәңсүров билән Яркәнт шәһириниң жигитбеши Нурмәһәмәт Турдиевқа һөрмәт билдүрүлди. Шуниң билән биллә саламәтлик сақчилири – терапевт-дохтур Турғанҗан Вәлиев, кардиолог Мерванәм Ниязмәмәтова, реаниматолог Қасимҗан Илиев, хирург Марат Абубәкриев, реаниматолог-нефролог  Марат Белалов вә башқиму ақ халатлиқ әвзәл җанларға тәшәккүрнамиләр тапшурулуп, жут-җамаәтчилик намидин илтипат көрситилди. Елимиз өсмүрлиригә билим вә тәрбийә бериштәк шәрәплик кәсип егилири, Яркәнт шәһиридики Билал Назим, Хелил Һәмраев намидики мәктәпләрниң мудирлири Шеринай Һасанова билән Зенәтбүви Баратоваға, бир топ жут атилири — жигитбашлириниң беминнәт әмгиги үчүн тәшәккүрнамиләр билән соғилар тапшурулди. Миллий мәдәнийәт маарип, мәтбуат, жутдарчилиқ ишларда җанкөйдүрүватқан жигитбашлири, ханим-қизларға ҖУЭМ вә наһийәлик Уйғур этномәдәнийәт мәркизиниң пәхрий ярлиқлири билән хатирә соғилири тәғдим қилинди. 
Тәнтәнә давамида «Пәрваз» хәлиқ ансамблиниң рәһбири Оғләм Тайирова рәһбәрлигидики Чоң Чиған йеза сәнъәткарлири, истедатлиқ нахшичи Абдурешит Һошуров, «Қәшқәр» уссулчилар ансамблиниң әзалири, «Бала дауысы» фестивалиниң қатнашчиси Эдиге Диханбаев нахша-уссуллардин чачқа чечип, көпчиликкә мәйрәмлик кәйпият һәдийә қилди. 
Үч саат давам қилған мәйрәмлик баш қошушта сөзгә чиққан пешқәдәм устаз Майминәм Имәрова, наһийәлик Уйғур этномәдәнийәт мәркизини узун жиллар башқурған, ҖУЭМ тәсис қилған «Сахавәт» медалиниң саһиби Дилшат Насиров, жут мөтивәри Алимҗан Ташмәтов вә башқилар көпмилләтлик тәвә хәлқи билән бирликтә, милләтләрара разимәнликтә өсүп келиватқан әвлатни қазақстанлиқ вәтәнпәрвәрлик роһта тәрбийиләштә, миллий мәдәнийитимизни риваҗландурушта мошундақ «бир яқидин баш, бир йәңдин қол чиқирип», бирликтә, өмлүктә иш елип бериш лазимлиғини қәйт қилишти. 
Бу күни шундақла наһийәдики хәйри-еһсанлиқ ишларда жүргән бир топ пидаийларму өткән жилда елип барған ишлириға һесават бәрди. Миллий мәдәнийитимизниң җанкөйәри Гөзәл Хизмәтова көпчиликни баққучисидин айрилған, ярдәмгә муһтаҗ,  тәминати төвән вә көпбалилиқ аилиләргә, нака балиларға, һәрхил ағриқларға муптила болғанларға ярдәм бериштә көпчиликни сәпәрвәр қиливатқан топ әзалириға минәтдарлиғини билдүрди. 

Панфилов наһийәси.

Турсунмәһәмәт МӘШҮРОВ чүшәргән сүрәт.