• Әхбаратлар еқими
• 13 Қаңтар, 2022

Мәңгүлүк әлниң мәхсити — иттипақлиқ

Хәлиқ — дана.Өз хаталиғидин өзи савақ алиду.Бирақ бир хаталиқниң кәйнидә қанчиму қайғу-һәсрәт ятиду десиңизчу. Йошуридиғини йоқ, пак көңүлгә чүшкән қара дағ әндишигә улашти. Кәскинләшкән вәзийәт ахири орни толмас яриға айланди. Қан төкүлди. Бегуна яшлар қурван болди. Әнди бу җараһәт өзлүгидин сақаймайду.
Бүгүнки күндә барлиқ ишәнчә Дөләт рәһбири Қасым-Жомарт Тоқаевта. Хәлиқниң ихласиму пәқәт Президентта. Хәтәрлик йолдин елини аман елип қелишқа бар қабилийәт-ихтидарини сәрип қиливатиду. Хәлиққә мураҗиәт елан қилди, һөкүмәт истипаға кәтти. Йеңи тайинлашлар башланди. Тегишлик әһмийәтлик  чарә-тәдбирләр атқурулуватиду. Дөләт рәһбириниң һазирқи қоллиниватқан тәдбирлирини толуқ қоллап-қувәтләймиз. 
Дәрвақә, Президентниң дуниявий бирләшминиң алдидики аброй-парасити әл бешиға чүшкән хейим-хәтәрни йеңип чиқидиғанлиғиға ишәнчимиз камил.Президентниң дадил қәдимини,әлвәттә,бизму  қоллаймиз. Бүгүн һәммимиз Президент әтрапиға  җәм болушимиз керәк. Елимизгә бирлик, иттипақлиқ керәк. Мошу апәтниң чиқиш сәвәплирини Қасым-Жомарт Тоқаев ениқ ейтти, көпчиликни ички-ташқи күчләрниң иғвалиридин сақ болушқа чақирди. «Сәвир түви-сериқ алтун», дәйду хәлиқ даналиғида.Көзи очуқ,қәлби ойғақ әвлат буни ениқ чүшиниши керәк. Мустәқиллик—бизниң  бебаһа байлиғимиз. Шуңлашқа әҗдатлардин мирас болуп келиватқан бирлигимизни йоқатмай, бир яқидин баш, бир йәңдин қол чиқирип,сәвир-тақәт қилғинимиз  әвзәл. Мәңгүлүк әлниң мәхсити—бирликтә! Мошуни унтимайли  қериндашлар.

Вильям МОЛОТОВ, шаир.