• Әхбаратлар еқими
• 13 Қаңтар, 2022

Оператив штаб мәҗлиси

Президент Қасым-Жомарт Тоқаевниң рәислигидә видеоконференцалақә тәртивидә оператив штабниң новәттики мәҗлиси өткүзүлүп, униңда Баш прокурор, Миллий бехәтәрлик комитетиниң рәиси вә ички ишлар һәм мудәпиә министрлириниң вәзиписини орунлиғучилар доклад билән сөзгә чиқти.
Баш прокурор Қасым-Жомарт Тоқаевқа пәвқуладдә һаләт тәртивини бузғанлиғи үчүн 2 161 шәхсниң мәмурий җавапкәрликкә тартилидиғанлиғи тоғрилиқ доклад қилди. Терроризмға қарши операция елан қилинған күндин етиварән мәмликәт бойичә 412 соталди тәргәв башланди, уларниң арисида терроризм һәрикәтлири вә қатиллиқлар бойичә ишларму тәргәв қилиниватиду. Прокуратура органлири Риқабәтчиликни қоғдаш вә тәрәққий әткүзүш агентлиғи билән бирликтә баһалар бойичә келишивелиши җәһәттин суюқлитилған газни сетиш субъектлирини тәкшүрүшни давамлаштуруватиду. 
Ички ишлар министрлиги тәрипидин Президентқа Алмута шәһиридә, Алмута, Җамбул, Қизилорда вә башқа вилайәтләрдә террорлуқ топларни уҗуқтуруш вә издәп тепиш бойичә мәхсус операцияләрниң давамлишиватқанлиғи тоғрилиқ һесават берилди. Қатиллиқ, һакимийәт органлириға мунасивәтлик зорлуқ көрситиш, хулиганлиқ, дөләт органлири беналириға һуҗум қилиш фактлири бойичә барлиғи болуп 388 җинаий иш қозғалди. 
Қураллиқ күчләр терроризмға қарши операцияләрни жүргүзүштә, Миллий бехәтәрлик комитети вә Ички ишлар министрлигигә ярдәм қилишни давамлаштуруватиду. Өткән тәвлүкләрдә 11 аһалилиқ пункттики блокпостларда һәрбий хизмәтчиләр тәрипидин 38 адәм тутулди, уларниң 23дин оқ етиш вә соғ қурал тепилди. Миллий бехәтәрлик комитетиниң Чегара хизмити билән бирликтә армия авиациясиниң ярдими билән тағлиқ йәрләрдә разведка издәш һәрикәтлири жүргүзүлмәктә. Һәрбийләр 25 аһалилиқ пунктқа орнитилған 105 блокпостта хизмитини давамлаштуруватиду.
Миллий бехәтәрлик комитети бәргән әхбарат бойичә, умумән, мәмликәттики вәзийәт турақлишиватиду. Кәскин деструктивлиқ көрүнүшләр тиркәлмиди. “Киберщит” системиси адәттики тәртиптә ишләватиду.
Президент кеңәшмисиниң йәкүнидә  мәмликәттә җәмийәтлик тәртипни вә бехәтәрликни әслигә кәлтүрүш бойичә паал ишни давамлаштурушниң муһим екәнлигини тәкитлиди.