Әхбаратлар еқими
27 Қаңтар, 2022

Қишлиқ Олимпиадиға — 87 йолланма

4 – 20-февраль арилиғида Беҗинда XXIV қишлиқ Олимпиада оюнлири өткүзүлиду.

Шөһрәт МӘСИМОВ,
“Уйғур авази”

Хитайниң Беҗин, Яньцин вә Чжанцзякоу шәһәрлиридә өтидиған оюнларға бизниң атлетлар спортниң сәккиз түри бойичә 87 йолланма йеңивалди. Мәсилән, спортчилиримиз чаңғуда чепишиш, фристайл, конькида чепишиш, биатлон, шорт-трек, тағ чаңғуси спорти, чаңғуда трамплиндин сәкрәш вә чаңғуда икки күрәш түри охшаш спорт мусабиқилиридә күч синишиду.
Миллий Олимпиада талланма командисиниң тәркивигә барлиғи болуп 34 спортчи кирди.
Йеқинда Миллий Олимпиада комитети мәмликәт талланма командисиниң спорт формиси билән тонуштурди. Олимпиадичилар формисида мәмликәт нами дәсләпки қетим латин һәриплири билән қазақ тилида йезилиду – «Qazaqstan». Формини елимиздики ZIBROO компанияси тикип чиқарди.
Кийим мәхсус Хитайниң қишлиқ климатиға мувапиқлаштурулған. Мәлумки, у йәрдә қишлиғи соғ, бәзидә наһайити қаттиқ болиду. Шуңлашқа үст кийим тәбиий ғаз пәйлири билән әстәрлинип, иссиқни тутидиған вә соғ өткүзмәйдиған заманивий мембранилиқ материаллар қоллинилди. Кийим қелинлиғиға қаримай, анчила еғир әмәс, наһайити әвришим вә һәрикәт қилғанда һечқандақ қийинчилиқ туғдурмайду.
Барлиғи болуп XXIV қишлиқ Олимпиада оюнлириға дунияниң 95 мәмликитидин 4 миңдин ошуқ спортчи қатнишиду. Улар спортниң 15 түри бойичә 109 медаль-комплект үчүн күч синишиду.
Мәлумки, Қазақстан миллий талланма командиси бүгүн Air Astana авиакомпаниясиниң чартерлиқ рейси билән Хитайға атлиниду.
Йеқинда Дөләт рәһбири қишлиқ Олимпиада вә Паралимпиада оюнлирида мәмликәт шәнини қоғдайдиған спортчилар билән учришип, уларға ақ йол тилиди вә Дөләт байриғини тапшурди. Ейтмақчи, шорт-трек вә конькида чепишиш маһирлири Абзал Ажғалиев билән Екатерина Айдова Қазақстан талланма командисиниң байрақдарлири болуп һесаплиниду.
Қишлиқ Олимпиада оюнлири 4-февральда башлиниду. Оюнларни рәсмий башлаш күни Хитайда кәң нишинлинидиған шәриқ календари бойичә Йеңи жилға тоғра келиду.
Қазақстан спортчилири мусабиқиләрни бир күн илгири башлайду –3-февральда улар спортниң фристайл-могул түри бойичә квалификациялик басқучта күч синишиду.
Йеқинда Миллий олимпиада комитети 2022-жилқи Беҗин қишлиқ оюнлириға қатнишидиған спортчиларниң толуқ тизимини елан қилди. Тизимға мувапиқ Беҗинға 34 спортчи атлиниду. Уларниң арисидин 19 атлет Олимпиадиға тунҗа қетим қатнишиватиду. Командиниң оттура йеши – 25 яш.
Шундақ қилип, чаңғуда чепишишта Қазақстан шәнини Виталий Пухкало, Евгений Величко, Ксения Шалыгина, Валерия Тюленева, Ирина Быкова, Надежда Степашкина вә Ангелина Шурыга қоғдайду.
Фристайл-могул бойичә мусабиқиләрдә елимизгә Юлия Галышева, Аяулым Әмренова, Олеся Граур, Анастасия Городко, Дмитрий Рейхерд вә Павел Колмаков, фристайле-акробатикида Жанбота Алдабергенова, Ақмаржан Қалмырзаева вә Шерзод Хаширбаев вакаләтлик қилиду.
Тағ-чаңғу спортида Захар Кучин вә Александра Троицкая күч синишиду.
Сергей Ткаченко вә Данил Васильев чаңғуда трамплиндин сәкрәш мусабиқилиригә қатнишиду.
Чиңғиз Ракпаров қишлиқ Олимпиада оюнлирида чаңғуда икки күрәш түри бойичә күч синишидиған дәсләпки қазақстанлиқтур.
Биатлонда Галина Вишневская-Шепоренко, Александр Мухин вә Владислав Киреев амитини синап көриду.
Коньки спортида Надежда Морозова, Екатерина Айдова, Дмитрий Морозов, Иван Аржаников вә Денис Кузин медаль үчүн күришиду.
Шорт-тректа Абзал Ажғалиев, Денис Никиша, Әдил Ғалиахметов, Яна Хан вә Ольга Тихонова маһаритини көрситиду.
Ейтмақчи, һазирға қәдәр қазақстанлиқ олимпиадичиларниң қайси күнлири спортниң қайси түри бойичә күч синишидиғанлиғи мәлум болди. Шундақ екән, биз гезитханларни жутдаш спортчиларниң мусабиқиләргә чүшүш кәштиси билән тонуштурушни мувапиқ көрдуқ.
Кәштидә Нур-Султан вақти көрситилгән. Бирақ, шуни қошумчә қилимизки, чаңғу спорти мусабиқилири очуқ асман астида өткүзүлгәнликтин, һава райи шараитиға бағлиқ уларниң башлиниш вақти өзгириши мүмкин.
3-февраль
16:00 – фристайл-могул, квалификация, Әрләр, Аяллар.

4-февраль
18:00 – Оюнларниң ечилиш мәрасими.
5-февраль
11:15 – чаңғуда трамплиндин сәкрәш, квалификация.
13:45 – чаңғуда чепишиш, скиатлон, Аяллар.
14:30 – коньки спорти, 3000 м, Аяллар.
15:00 – биатлон, микст-эстафета.
16:00 – фристайл-могул, Әрләр.
17:00 – шорт-трек, 1000 м, квалификация, микст. Әрләр.
6-февраль
9:00 – тағ чаңғуси спорти, даунхилл, Әрләр.
13:00 – чаңғуда чепишиш, скиатлон, Әрләр
16:00 – фристайл-могул, Аяллар.
17:00 – чаңғуда трамплиндин сәкрәш, Әрләр.
7-февраль
8:15 – тағ чаңғуси спорти, слалом-гигант, Әрләр.
14:30 – коньки спорти, 1500 м, Аяллар.
15:00 – биатлон, айрим чепишиш, 15 км, Аяллар.
17:44 – шорт-трек, 1000 м, Әрләр.
8-февраль
9:00 – тағ чаңғуси спорти, Super G, Әрләр.
14:00 – чаңғуда чепишиш, спринт, Әрләр вә Аяллар.
14:30 – биатлон, айрим чепишиш, 20 км, Әрләр.
16:30 – коньки спорти, 1500 м, Әрләр.
9-февраль
8:15 – тағ чаңғуси спорти, слалом, Аяллар.
14:00 вә 17:00 – чаңғуда икки күрәш түри.
17:00 – шорт-трек, 1000 м, Аяллар, квалификация, 1500 м, Әрләр.
10-февраль
8:30 – тағ чаңғуси спорти, арилаш слалом, Әрләр.
13:00 – чаңғуда чепишиш, 10 км, Аяллар.
17:00 – фристайл-акробатика, микст.
11-февраль
9:00 – тағ чаңғуси спорти, Super G, Аяллар.
13:00 – чаңғуда чепишиш, 15 км, классика, Әрләр.
15:00 – биатлон, спринт, Аяллар.
15:45 – чаңғуда трамплиндин сәкрәш, квалификация.
17:00 – шорт-трек, 500 м, Әрләр, квалификация, 1000 м, Аяллар.
12-февраль
13:30 – чаңғуда чепишиш, эстафета, Аяллар.
14:53 – коньки спорти, 500 м, Әрләр.
15:00 – биатлон, спринт, Әрләр.
17:00 – чаңғуда трамплиндин сәкрәш.
13-февраль
8:15 – тағ чаңғуси спорти, слалом-гигант, Әрләр.
13:00 – чаңғуда чепишиш, эстафета, Әрләр.
15:00 – биатлон, Әрләр, Аяллар.
17:00 – шорт-трек, 500 м, Әрләр.
17:00 – фристайл-акробатика, квалификация, Аяллар.
14-февраль
17:00 – фристайл-акробатика, Аяллар.
15-февраль
9:00 – тағ чаңғуси спорти, даунхилл, Аяллар.
14:00 вә 17:00 – чаңғуда икки күрәш түри.
15:00 – биатлон, эстафета, Әрләр.
17:00 – фристайл-акробатика, квалификация, Әрләр.
19:56 – коньки спорти, Аяллар.
16-февраль
8:15 – тағ чаңғуси спорти, слалом, Әрләр.
13:45 – биатлон, эстафета, Аяллар.
15:00 – чаңғуда чепишиш, командилиқ спринт, Әрләр, Аяллар.
17:00 – фристайл-акробатика, Әрләр.
17:30 – шорт-трек, 1500 м, Аяллар.
17-февраль
8:30 – тағ чаңғуси спорти, арилаш слалом, Аяллар.
14:30 – коньки спорти, 1000 м, Аяллар.
18-февраль
14:30 – коньки спорти, 1000 м, Әрләр
15:00 – биатлон, масс-старт, Әрләр.
19-февраль
12:00 – чаңғуда чепишиш, марафон, Әрләр.
13:00 – коньки спорти, масс-старт, Әрләр, Аяллар.
15:00 – биатлон, масс-старт, Аяллар.
20-февраль
12:30 – чаңғуда чепишиш, марафон, Аяллар.
18:00 – Оюнларниң йепилиш мәрасими.