• Әхбаратлар еқими
• 11 Мамыр, 2022

Мустәқилликниң мустәһкәм қорғини

Қасым-Жомарт Тоқаев йеқинда дөләт мукапатлирини, алий һәрбий вә мәхсус унванларни, класслиқ дәриҗиләрни тапшуруш мәрасимиға қатнашти.
Президент мәрасим қатнашқучилирини Вәтән һимайичиси күни вә Ғалибийәт күни билән тәбрикләп, һәрбий хизмәтчиләрниң һәм мәхсус дөләт органлири хадимлириниң мәмликитимиз бехәтәрлигини тәминләшкә алаһидә һәссә қошуватқанлиғини атап көрсәтти. 
– Бийил Қаазақстан Қураллиқ күчлириниң қурулғиниға 30 жил толиду. Мошу вақит ичидә бизниң әскәрлиримиз шанлиқ-шавкәтлик армиягә айланди. Бизниң җәңчиләр кирпик қақмай, мәмликәт чегарилирини күзитиватиду. Улар дөләтчилигимизни мустәһкәмләшкә чоң һәссә қошуватиду. Бизниң Қураллиқ күчлиримиз – шанлиқ-шавкәтлик армиягә айланди. Бизниң Қураллиқ күчлиримиз – бу Мустәқилликниң мустәһкәм қорғини, хәлиқниң пухта қалқини, – деди Қасым-Жомарт Тоқаев.
Президент заманивий, яхши қуралланған армияниң дөләтчилигимизниң ишәшлик таянчи екәнлигини тәкитлиди. 
– Геосәясий турақсизлиқ, йеңи синақ вә ховуплар шараитида биз өзимизниң миллий мәнпийәтлиримизни һимайә қилишқа, дөләтниң суверенитетини вә территориялик пүтүнлүгини сақлап қелишқа тәйяр болушимиз керәк. Шуңлашқа мудапиә иқтидарини ашуруш һәрқачан бизниң муһим әвзәллигимиз болиду, – дәп билдүрди Дөләт рәһбири.
Қасым-Жомарт Тоқаев һәрбий органларда хизмәт қилишниң пәхрий вәзипә вә чоң җавапкәрлик екәнлигини тәкитлиди. У Қазақстан Қураллиқ күчлири солдатлири билән офицерлириниң дайим жуқури җәңгиварлиқ маһарәт көрситип келиватқанлиғини қәйт қилди.
Президент Улуқ Вәтән уруши жиллирида 500гә йеқин қазақстанлиқниң Кеңәш Иттипақиниң Қәһримани болғанлиғини, бирақ бизниң нурғун уруш қатнашқучилиримиз җасаритиниң түрлүк сәвәпләргә бағлиқ мунасип баһаланмиғанлиғини әслитип өтти. 
Қасым-Жомарт Тоқаев өз нутқида мәрасимға қатнишиватқан офицерларға вапатидин кейин алий пәриқ бәлгүсигә – «Халық Қаһарманы» унваниға сазавәр болған үч қазақстанлиқ уруш қатнашқучисиниң җасарити тоғрилиқ сөзләп бәрди.
– Биринчиси – бу даңлиқ мәргән Төлеуғали Әбдибеков. У җәң мәйданлирида 397 дүшмәнни уҗуқтурди. Қаза болғандин кейин қазақ хәлқиниң қәһриман пәрзәнди Кеңәш Иттипақиниң Қәһримани унваниға тәвсийә қилинған еди. Ваһаләнки, униң җасарити диққәт-етиварсиз қалди.
Шундақла капитан Александр Несмиянов әҗайип әрлик вә қәһриманлиқ үлгисини көрсәтти. Мустәһкәм бәкитилгән хәндәккә һуҗум қилиш вақтида у җүръәтлик билән һуҗумға өтүп, пүткүл батальонни башлап маңиду. Несмиянов дүшмән истиһкамини биринчи болуп бузуп өтүп, ялғуз өзи дүшмәнниң 20 солдити билән елишиду, уларниң 13ни уҗуқтуруп, қалғанлирини қечишқа мәҗбур қилиду. Йәнә бир җәңдә у дүшмәнниң арқа сепигә өтиду вә асасий ховупни өзигә қаритип, сәпдашлириға мудапиәни бузуп өтүш имканийитини яритиду. Андин кейин икки рота командири яридар болғанда, қоманданлиқни өз зиммисигә алиду. Александр Несмиянов үч қетим Кеңәш Иттипақиниң Қәһримани унваниға тәвсийә қилиниду, бирақ тәвсийәнамиләр һәрқачан адаләтсизлик билән рәт қилиниду. 
Жутдишимиз Ибрайим Сүлейменовму мәргән болған. Бир жилда у дүшмәнниң 289 солдитини уҗуқтурди. Қазақ хәлқиниң йәнә бир шанлиқ қәһримани Мәншүк Маметова билән биллә адаққи нәпәси қалғичә җәң қилип, җәңдин кейин һалак болиду. Уларниң һәр иккисиниң Қәһриман унваниға тәвсийә қилинғиниға қаримай, Ибрайим Сүлейменовниң җасарити мунасип баһаланмиди, – деди Президент. 
Тәнтәнилик мәрасимға Төлеуғали Әбдибеков билән Ибрайим Сүлейменовниң уруқ-туққанлири қатнашти. Қасым-Жомарт Тоқаев уларға алаһидә пәриқ бәлгүси – Алтун Юлтуз вә «Отан» орденини тапшурди. 
Александр Несмияновниң мукапити музейдин мунасип орун егиләйду. 
Төлеуғали Әбдибековниң туққини Айгүл Кемелбаева Қасым-Жомарт Тоқаевқа вә шанлиқ бовисиниң исмини әбәдийләштүрүшкә һәссә қошқан барлиқ җавапкәр шәхсләргә миннәтдарлиқ билдүрди. 
Ибрайим Сүлейменовниң сиңлиси Айткүл Сүлейменова Дөләт рәһбиригә сәмимий миннәтдарлиғини билдүрди вә униңға мустәһкәм саламәтлик һәм Йеңи Қазақстанни қурушта утуқ-муваппәқийәт тилиди.
– Бу – тарихий адаләтликниң һәқиқий тәнтәниси. Биз буниңдин кейинму қәһриманлиримизниң исимлирини қайтуруп, уларни мәдһийиләймиз. Уларниң җасарити һечқачан унтулмайду. Уруш қатнашқучилири уларниң әвлатлири үчүн һәрқачан үлгә болиду, – дәп тәкитлиди Дөләт рәһбири.
Қасым-Жомарт Тоқаев мәрасим ахирида дөлитимизниң пүтүнлүги вә бехәтәрлигини һимайә қиливатқан барлиқ гражданларға миннәтдарлиқ билдүрди.
Президент андин кейин офицерларға һәрбий һәм мәхсус унванларни бәрди вә дөләт мукапатлирини тапшурди.