• Әхбаратлар еқими
• 19 Мамыр, 2022

655 интернет-сайт йепилди

“Интернетниң ярдими билән наркотик сетиш фактлири бойичә 82 җинаий иш қозғалди, реклама вә тәрғип қилиш бойичә 37 җинаий иш тәргәв қилиниватиду”, дәп билдүрди йеқинда Қазақстан Җумһурийити Ички ишлар министрлиги Норкоҗинайәткә қарши туруш бойичә департамент башлиғиниң вәзиписини вақитлиқ атқурғучиси Асхат Мухаметқалиев.
“Һазирқи күндә наркотикларни сатқучилар пәқәт интернет арқилиқ ишләйду. Улар мобиллиқ қошумчиларни пайдилинип, херидарларни мессенджерлар арқилиқ тапиду. Улар үчүн һәқму онлайн төлиниду. Ахча тегишлик адәмләргә чүшкәндин кейин, херидарға наркотик йошурунған җай хәвәр қилиниду, дәйду спикер.
Мутәхәссисниң ейтишичә, адәттә җинаий тармақтикиләрниң һечқайсиси бир-бирини тонумайду, әнди уни тегишлик җайға йошурғучилар интернет-ресурслар арқилиқ хәвәрлишиду.
Асхат Мухаметқалиевниң сөзичә, бу җинаий схемиларни уюштурғучилар көпинчә чәт әлләрдә туриду. Шуниң үчүн мутәхәссисләр наркотикларни тарқитиш бойичә әхбаратқа егә сайтларни, постларни, блогларни вә рекламилиқ еланларни ениқлаш үчүн интернет-бошлуқни мониторинг қилиду.
“Жил бешидин тартип 655 әйнә шундақ интернет-ресурслар ениқлинип, паалийити тохтитилди” дәп сөзини йәкүнлиди Асхат Мухаметқалиев.