• Әхбаратлар еқими
  • 22 Қыркүйек, 2022

Хәлиқ үмүтини ақлишимиз керәк

Мустәқил Қазақстанда кейинки жилларда маарип саһасиға мунасивәтлик көплигән йеңилиқ-өзгиришләрниң болуватқанлиғи һәммимизгә мәлум. Шуларниң қатарида бирмунчә ислаһатларму әмәлгә ашурулди. Муәллим мәртивисини көтиришкиму алаһидә көңүл бөлүнди. Дөләт рәһбири Қасым-Жомарт Тоқаевниң бу қетимқи Мәктүбидиму билим бериш мәсилисигә аит бирқатар баһалиқ пикирләр алға сүрүлди. Җүмлидин оттура билимниң утуқлуқ милләтни шәкилләндүрүшниң йәнә бир әһмийәтлик амили болуп һесаплинидиғанлиғи, һәрбир қазақстанлиқ мәктәп оқуғучисиниң оқуш вә һәртәрәплимә риваҗлиниши үчүн мунасип шараитқа егә болуши тоғрилиқ баян қилиниду. 
Һәқиқәтәнму биз елимизниң, хәлқимизниң келәчигини ойлисақ, бар күч-ғәйритимизни яш әвлатқа заман тәләплиригә лайиқ пухта билим вә аңлиқ тәрбийә беришкә сәрип қилғинимиз әвзәл. Шундақла устазлар ата-анилар һәм җәмийәт билән һәмкарлиқта балиниң оқуп, һәртәрәплимә йетилиши үчүн тегишлик шараит яратқандила көзлигән мәхситимизгә йетәләймиз дәп ойлаймән.
Бүгүнки таңда елимиздә билим дәргаһлири көпләп селиниватсиму, уларни йетәрлик дәп ейтишқа болмайду. Бәзи җайларда оқуғучилар һалакәт гирвигидики мәктәпләрдә тәһсил көрүватса, айрим аһалилиқ пунктларда синиплар йетишмәй, балилар үч сменида оқушқа мәҗбур. Интернет системиси тоғра йолға қоюлмиған йеза-мәһәллиләрниң қанчилик қийинчилиқларға дуч келиватқанлиғи һазир һечким үчүн сир әмәс. Һә, мундақ шараитта яш әвлатниң тәләпләр дәриҗисидә билим алидиғанлиғиға ким кепиллик берәләйду? Президент мошундақ муһим мәсилиләрни түп- асасидин йешиш мәхситидә, 2025-жилғичә заманивий тәләпләргә җавап беридиған 800 миң оқуғучи орниниң вуҗутқа келидиғанлиғини, буниң авариялик әһвалдики вә үч сменилиқ мәктәпләр проблемисини толуқ һәл қилиш имканийитини бериғанлиғини алаһидә тәкитлиди. Дөләт рәһбири ейтқинидәк, бу чариләрниң шәһәр билән йезилардики билим сүпити оттурисидики пәриқни хелә тәңләштүридиғанлиғи чоқум. 
 Оқуғучиларниң мәктәп кийими билән толуқ тәминлиниши, айрим иҗтимаий җәһәттин аҗиз балиларға уни бюджет һесавиға бериш керәклиги охшаш мәсилиләрму Президент нәзәридин сирт қалмиди. Һәқиқәтәнму балини мәктәпкә тәйярлаш пәйтидә ата-аниларниң бу проблемиға дуч келидиғанлиғи талашсиз. Чүнки дәрисликләр билән қолланмиларниң, концеляриялик затларниң вә башқиму һаҗәтликләрниң баһалири һәдди-һесапсиз қиммәтләп кәтти. Униңға мәктәп кийимини қошуң. Мошуниң барлиғини сетивелишқа һәммә ата-аниниң малийәвий әһвали яр бәрмәйду, әлвәттә. Әнди бир өйдин бирнәччә бала оқуйдиған аилиләрниң әһвали техиму мүшкүл. Мундақ шараитта һөкүмәтниң ярдими бәк зөрүр дәп һесаплаймән.
Президентимиз бу қетимқи Мәктүбидә Адаләтлик Қазақстанни қурушта мәктәп муәллимлириниң һәл қилғучи роль ойнайдиғанлиғиға чоңқур ишинидиғанлиғини ейтти. Шуңлашқиму биз, муәллимләр, дуч кәлгән һәрқандақ қийинчилиққа бәрдашлиқ берип, бар иш-тәҗрибимизни, билим-қабилийитимизни ишқа селип, өзимизгә жүкләнгән вәзипә һөддисидин муваппәқийәтлик чиқишимиз лазим. Шу чағдила биз өз пәрзәнтлириниң тәғдирини ишәш қилип тапшурған ата-аниларниң үмүтини ақлалаймиз.

Зухра БАРАТОВА, 
Уйғур наһийәси Дардамту оттура мәктиви тарих пәниниң муәллими.

40 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы