• Әхбаратлар еқими
• 22 Қыркүйек, 2022

Аммивий оқушқа җәлип қилиниду

Җумһурийәт Президентиниң Қазақстан хәлқигә йоллиған ахирқи Мәктүбидә пенсия системисини мукәммәлләштүрүш мәсилисигә алаһидә диққәт ағдурулди. Әмгәк вә аһалини иҗтимаий җәһәттин һимайә қилиш министрлиги һазирниң өзидә Дөләт рәһбириниң тәшәббусини иш йүзидә әмәлгә ашурушқа ярдәм беридиған механизмларни ишләп чиқишқа киришти. Шуни тәкитләш керәкки, Қазақстанда һазирқи күндә икки миллионға йеқин пенсия йешидики адәм яшаватиду, ениғирақ ейтқанда, мәмликәтниң он турғининиң бири – пенсионер.
Йеқинда Алмута шәһири Әмгәк вә аһалини иҗтимаий җәһәттин һимайә қилиш комитети рәһбириниң орунбасари Ризвангүл Дәраева җумһурийәт пенсия системисиға киргүзүлидиған бәзибир өзгиришләргә изаһ бәрди. Президент Қасым-Жомарт Тоқаевниң җумһурийәт хәлқигә йоллиған Мәктүбидә, ейтилғинидәк, пат-йеқинқи бәш жилда аяллар 61 яшта пенсиягә чиқидиған болиду.
Ризвангүл Дәраеваниң сөзичә, мәзкүр чарә таҗсиман вирусниң гражданлар саламәтлигигә сәлбий тәсир йәткүзүшигә, шундақла уларниң һаятиниң қисқиришиға бағлиқ һаҗәт болди.
Шуни әскә селип өтүмизки, Қазақстанда бир йерим миллионға йеқин адәм таҗсиман вирусни жуқтурғанлиғи рәсмий тиркәлди. Жигирмә миңға йеқин адәм мәзкүр кесәлдин көз жумди.
Пат-йеқинқи жилларда саламәтликни сақлаш системисини, җүмлидин йеза медицинисиниң алаһидә муһим проблемилирини заманивийлаштуруш бойичә ишлар риваҗландурулиду, дәп билдүрди йеқинда өткән брифингта җумһурийәт саламәтликни сақлаш министри Ажар Ғиният. Буниңдин ташқири йеңи реалибитация вә сағламлаштуруш мәркәзлирини селиш көздә тутулмақта.
Ризвангүл Дәраева шундақла пат-йеқинқи төрт жил ичидә базилиқ пенсия оттура һесапта бир йерим һәссигә өсидиғанлиғини хәвәр қилди. Пенсия төләмлириниң миқдари һәр жили өсидиған болиду, бу 2025-жилға қәдәр пенсияниң умумий миқдарини 27 пайизға ашурушқа мүмкинчилик яритиду. Базилиқ пенсия һәр жили тәхминән 13 пайизға өсидиған болиду.
Пенсия төләмлириниң өсүши Қазақстанниң икки миллионға йеқин пенсионери үчүн яхши ярдәм болиду вә яшанған адәмләр арисидики намратчилиқ әһваллирини йоқ қилиду.
Бирпүтүн пенсия топлаш фонди системиси үчүн йеңи инвестициялик стратегия ишлинип чиқиду, у жиғилған ахчини башқуруш механизмини техиму мукәммәлләштүриду. Мәзкүр ишқа инвестиция саһасида өзиниң яхши тәрәплирини көрсәткән вә бу хилдики активлар билән узун жиллардин бери ишләп, тәҗрибә топлиған шәхсий ширкәтләр җәлип қилиниши мүмкин.
Пат-йеқинқи жилларда иш бәргүчиләр мәҗбурий түрдә беридиған пенсия бәдәллирини җарий қилиш йәнә бир муһим вақиә болмақчи. Мәзкүр чарә пәйдин-пәй – 2023-жилдин 2027-жиллар арилиғида җарий қилиниду. Әмгәк вә аһалини иҗтимаий җәһәттин һимайә қилиш министрлигиниң хәвиричә, мәзкүр системини җарий қилиш әмгәк паалийитини аяқлаштурған вәтәндашлиримизға қошумчә пенсия төлимини елишқа имканийәт яритиду.
Министрликтикиләрниң ейтишичә, иш бәргүчиләрниң мәҗбурий пенсия бәдәллирини җарий қилиш механизмини ишләп чиқишта чәт әл тәҗрибиси һесапқа елинди. Дунияниң бәзи әллиридә иш бәргүчи өз хадиминиң пенсия төлиминиң йеримини яки нурғун қисмини япиду. Қазақстан Җумһурийити Әмгәк вә аһалини иҗтимаий җәһәттин һимайә қилиш министрлигиниң һесаплишичә, җарий қилинидиған йеңилиқ пенсия төләмлирини әвәтишкә бағлиқ ишни нәтиҗидарлиқ тәхсим қилишқа имканийәт бериду.
Идаридикиләр тиҗарәтчиләрниңму мәнпийитини һесапқа алидиған болиду. Көплигән ширкәтләргә таҗсиман вируси ағриғидин кейин иш елип бериш оңайға чүшмәйватиду. Шуниң үчүн Әмгәк министрлиги бу йеңилиқни җарий қилишқа алдиримайватиду, йеңи мәҗбурий төләм пәйдин-пәй җарий қилинидиған болиду. Министрликтикиләрниң тәкитлишичә, мәзкүр йеңилиқ 1975-жилдин кейин туғулған гражданларни қоллап-қувәтләшкә қаритилған. Тәкитләш керәкки, пенсия төләмлириниң бириккән қисми жилдин-жилға төвәнләватиду, сәвәви, мәзкүр әһвалда әмгәк стажи һесапқа елиниду. Буниңда ишчиниң умумий пенсия мәблиғини топлаш системиси җарий қилинғичә яки 1998-жилғичә әмгәк стажи кириду.
Әмгәк вә аһалини иҗтимаий җәһәттин һимайә қилиш министрлиги жүргүзүватқан йәнә бир муһим иш бу иҗтимаий кодекс лайиһисини ишләпчиқириштур. Униң җарий қилиниши түпәйли гражданларни иҗтимаий җәһәттин һимайә қилиш механизмлар мукәммәллишиду. Иҗтимаий кодексниң җарий қилиниш нәтиҗидарлиғини бизниң барлиқ вәтәндашлиримиз, болупму җәмийәтниң һал-оқити төвән қатламлири һис қилиши лазим.
Әмгәк министрлигидикиләрниң тәкитлишичә, қазақстанлиқларни аммивий билим елиши вә билим дәриҗисини ашуруш үчүн шараит яритиш наһайити муһим. Мәзкүр вәзипиләрни әмәлгә ашурушниң асаслири җумһурийәтниң иҗтимаий кодексида өз әксини тапиду.
Идаридикиләр әмгәк қилишқа қабилийәтлик яшта болған барлиқ гражданларни (9 миллионға йеқин адәм) аммивий оқутуш программисиға җәлип қилишни көзләватиду. Илгири пәқәт бәлгүлүк категориягә тәәллуқ болған гражданларла бу программиға җәлип қилинған.
Әмгәк министрлигиниң ейтишичә, шу чағда вақитлиқ ишсиз жүргәнләр вә мәмликәт аһалисиниң башқиму айрим топлири үчүн қисқа қәрәллик мәхсус курсларни ечиш билән чәкләнгән.
Хадимларниң билимини ашуруш ишида иш бәргүчиләрму җәлип қилиниду. Улар кәспини өзгәртиш бойичә курсларни уюштуриду.
Мәзкүр курсларни тиңшиғучилар һәм һәқсиз, һәм һәқ төләп оқутулидиған программиларға қатнишалайду.
Буниңдин ташқири вәтән алий оқуш орунлирида вә колледжларда билим бериш сүпитини ашурушқа алаһидә диққәт ағдурулиду. Планда – оқуш орунлириға хелә жуқури тәләпләрни қоюш, шундақла кадрларниң квалификация системисини йеңилаш ишлири бар.