• Әхбаратлар еқими
• 29 Қыркүйек, 2022

Алтә саһа коррупциядә гуманлиниду

Йеқинда Алмута шәһири һакиминиң орунбасари Асқар Амринниң рәислигидә шәһәрниң коррупциягә қарши күришиш мәсилилири бойичә комиссиясиниң новәттин ташқири кәңәйтилгән мәҗлиси өтти. Мәҗлискә шәһәр наһийәлириниң һакимлири, дөләт вә һоқуқ қоғдаш органлириниң, квазидөләтлик секториниң рәһбәрлири вә җамаәтчилик вәкиллири қатнашти.

Насирахун РОЗАХУНОВ,
«Уйғур авази»

Мәҗлис давамида Асқар Амрин дөләт органлириниң вә җәмийәтниң өз вақтида вә уйғунлашқан һәрикәтлири түпәйлила коррупциягә нәтиҗидарлиқ қарши турушниң мүмкин екәнлигини алаһидә тәкитлиди.
«Дөләт рәһбири тәрипидин тәстиқләнгән Қазақстан Җумһурийити коррупциягә қарши туруш сәяситиниң концепциясини әмәлгә ашуруш даирисидә коррупциягә қарши туруш мәдәнийитини шәкилләндүрүш, коррупциягә қарши турушқа қаритилған әмәлий чариләрниң әвзәлликкә егә болушини тәминләшкә мәнпийәтдар вә актив болуш зөрүр», – дәп тәкитлиди шәһәр һакиминиң орунбасари Асқар Амрин.
Қазақстан Җумһурийитиниң коррупциягә қарши туруш бойичә агентлиғи мәхсус хизмитиниң башлиғи Саян Ахметжанов өзиниң докладида мәмликәтниң һәрбир региониниң муһим проблемилири киргүзүлгән коррупция тавакәлчилигиниң хәритиси ишлинип чиққанлиғини тәкитлиди.
Хәритидә нәқ җәриянларниң очуқ әмәслигидин, мәмурий тосалғулуқларниң барлиғидин, қанунниң мукәммәл әмәслигидин һәл қилинмай келиватқан муһим мәсилиләр әкис етилгән.
Алмута шәһири бойичә алтә йөнилиштә – қурулуш, экология, фискаль саһаси, иҗтимаий саһа, ихтисат вә малийә саһаси бойичә коррупция ховупи гуманлиниду. Бу – шәһәрдә яшайдиған адәмләр күндиликтә дучар болидиған асасий проблемилар. Мошуниңға бағлиқ агентлиқ үчүн мәзкүр хәритә асасий нишан болғуси.
Шәһәр һакиминиң орунбасари Асқар Амринниң тәкитлишичә, коррупциягә қарши туруш бойичә агентлиқ дөләтниң коррупциягә қарши туруш сәяситини жүргүзгүчиси болуп һесаплиниду. У өз паалийитидә нәтиҗидарлиқ иш елип беришни, миқияслиқ оқутушни, җәмийәт билән конструктив иш елип беришни вә җинаий-һоқуқ чарилирини бириктүрүши һаҗәт.