• Әхбаратлар еқими
  • 24 Қараша, 2022

Әхбаратлар еқими

Қазақстан вә ЕИ – яхши шерикләр
Дөләт рәһбири йеқинда Европа иттипақиниң Ташқи ишлар вә бехәтәрлик сәясити бойичә алий вәкили – Европа комиссиясиниң вице-президенти Жозеп Боррель билән учрашти.
Қасым-Жомарт Тоқаев Жозеп Боррельға илтипат билдүрүп, униң Астанаға қилған сәпириниң Қазақстан вә ЕИ оттурисида өзара һәрикәтни күчәйтиш нуқтәий нәзәридин әһмийәтлик екәнлигини тәкитлиди. 
Президентниң сөзичә, Қазақстан вә Европа иттипақи оттурисидики кәң шериклик һәм һәмкарлиқ тоғрилиқ келишим барлиқ саһалардики һәмкарлиқни чоңқурлитиш йолида йеңи басқучқа асас салди. 
– Биз Қазақстан вә ЕИ оттурисидики жуқури дәриҗидики алақиләрни қоллап-қувәтләймиз. Шу мунасивәттә Европа кеңишиниң президенти Шарль Мишельниң сәпирини вә мениң Европа комиссиясиниң президенти Урсула фон дер Ляйен билән өткүзгән музакирилиримни тилға алғум келиду, улар наһайити үнүмлүк болди. Шундақла Мисирда Қазақстан Премьер-министри вә Урсула фон дер Ляйен имзалиған Меморандумни тәкитләп өткүм келиватиду. Бу өзара һәмкарлиқ турғусидин наһайити ениқ қәдәм болди, –деди Дөләт рәһбири. 
Өз новитидә Жозеп Боррель Қасым-Жомарт Тоқаевқа сәмимий қобул қилғанлиғи үчүн миннәтдарлиқ билдүрүп, Астана вә Брюссель оттурисидики өзара мунасивәтләрниң иҗабий тәрәққий етиватқанлиғини қәйт қилди. 
– Мән ЕИ вә Қазақстанниң яхши шерикләр екәнлигидин хурсәнмән. Биз өзара ишәнчә вә һөрмәт билән умумий ховуп-синақлар тоғрилиқ гәп қиливатимиз. Мениң сәпирим силәр мәмликәтни хелә очуқ, хелә инклюзив вә хелә демократик қилиш үчүн униң қайта қуруш бойичә җиддий ислаһатлар җәриянини башлиған наһайити муһим вақитқа тоғра кәлди, – дәп тәкитлиди ЕИниң Алий дәриҗилик вәкили. 
Учришиш давамида Қазақстан вә Европа иттипақи оттурисидики ихтисадий һәм инвестициялик алақиләрни техиму күчәйтиш истиқбали муһакимә қилинди. 

«Жас сарбаз» һәрбий-вәтәнпәрвәрлик нахша фестивали өтти
Қазақстанниң барлиқ регионлиридин кәлгән «Жас сарбаз» балилар-яшлар һәрикитиниң 150тин ошуқ әзаси «Вокал», «Фольклор» вә «Вокал-саз әсваплири ансамбли» номинациялири бойичә күч синашти.
Жюри әзалири алдида мурәккәп вәзипә турди. Уларниң диққитигә 50тин ошуқ номер тәвсийә қилинди. Фестиваль қатнашқучилириниң әмгәклири вокал мәлуматлири, иҗра қилиш маһарити, артистизм вә иҗра қилиш эстетикиси бойичә баһаланди.
– Тәкитләш керәкки, «Жас сарбаз» фестивали яшлар арисида чоң аммибаплиққа егә. Музыка җәңчиләрниң җәңгиварлиқ роһини мустәһкәмләйду, күндилик паалийитидики иштин һадуғини чиқириду, җәңләрдә җәңчиләрни ғалибийәт энергияси билән тәминләйду. Әнди ғалибийәт бар йәрдә, нахша бар», – дәйду мудапиә министриниң орунбасари генерал-лейтенант Султан Камалетдинов.
Фестивальда «Вокал» номинацияси бойичә Ғәрбий Қазақстан вилайитиниң вәкили Темирлан Батырбек биринчи орунни егилиди. Атырав вилайитиниң вәкили Дастан Бағытжан – иккинчи, «Жас Қыран» пайтәхт һәрбий колледжиниң триоси үчинчи орунға муйәссәр болди.
«Фольклор» номинациясидә Астана шәһириниң «Ақ желең» ансамбли ғалип чиқти. Иккинчи орун «Арыстан» мәхсус лицейиниң «Домбра» ансамблиға, үчинчи орун «Жас улан» Алмута җумһурийәтлик мәктивиниң «Ұлытау» топиға буйриди.
Вокал-чалғу әсваплар ансамбли номинациясидә «Арыстан» мәхсус лицейиниң «Авангард» иҗадий коллективи «Әң яхши ансамбль» дәп етирап қилинди. Павлодар вилайитиниң «Әуен» вокал-чалғу әсваплар ансамбли – иккинчи, «Жас улан» Алмута җумһурийәтлик мәктивиниң «Ұлытау» топи үчинчи орунни егилиди.
Шундақла чимкәнтлик Жайна Нурмахан вә «Восток» регионаллиқ қоманданлиғиниң вәкили Диана Рашитова вә чимкәнтлик Еңлик Байзах, алмутилиқ Айсултан Мухамадиев әң яхши иҗрачилар сүпитидә етирап қилинди.
Фестивальниң Баш мукапитини Талдиқорғанниң десант-һуҗум қилиш әскәрлири һәрбий-вәтәнпәрвәрлик клубиниң тәрбийиләнгүчиси Арсен Самаратбеков йеңивалди.

Иккинчи орунни егилиди
Қазақстан мәктәп оқуғучилири Роботехника бойичә дуниявий олимпиадида дәсләпки қетим иккинчи орунни егилиди. Бу тоғрилиқ маарип министри Асхат Аймағамбетов иҗтимаий тармақларда хәвәр қилди.
Германияниң Дортмунд шәһиридә өткән олимпиадида Чимкәнт шәһиридики Жабаев намидики 26-мәктәпниң вә 9-IT-лицейниң оқуғучилири Иманғали Мыңжасар билән Бибарыс Михаш мукапатлиқ иккинчи орунға сазавәр болди. 
World Robot Olympiad 2004-жилдин бери өткүзүлүп келиватиду. Бийил финалда дунияниң 73 мәмликитидин 365 команда мукапатлиқ орунлар үчүн күч синашти. Әнди таллавелиш басқучлириға пүткүл дуния бойичә 15 миң команда иштрак қилған еди. 
– Балиларниң дуниявий мәйданларда ғалибийәт қазиниши пәхирлиниш туйғулирини пәйда қилиду. Бизниң яш вә талантлиқ оқуғучилиримизни жуқури нәтиҗигә еришиши билән тәбрикләймән! Шундақла уларниң устазлири билән ата-анисини тәбрикләймән! Балиларниң техиму жуқури чоққиларни егилишини тиләймән! – дәп язди министр Асхат Аймағамбетов. 
 
Йешил рәңлик шәһәр
Өткән йәкшәнбә күни Алмута шәһирини 2025-жилғичә тәрәққий әткүзүш вә 2030-жилғичә оттура муддәтлик истиқбал программисини тәрәққий әткүзүш даирисидә “Йешил мәктәп” экофестивали өтти. Чарә-тәдбир Қазақстан шәһәрлиридики экология проблемилириға вә уларни һәл қилиш йоллириға беғишланди.
Уни шәһәр һакимийити билән биллә тәшкилатларда, алий оқуш орунлирида, мәктәпләрдә экология қәдир-қиммәтлирини җарий қилидиған кәспий тәшкилат – ECO NetworK ширкити уюштурди. Һазирқи күндә Қазақстанниң алтә шәһиридә лайиһиләр тәклип қилинди, униңға 100дин ошуқ тәшкилат әза. Ширкәт 45 миңдин ошуқ адәмни бирләштүргән.
“Йешил мәктәп” экофестивали – бу шәһәр экология мәдәнийитини тәрәққий әткүзүшниң умумий концепциясиниң стратегиясиниң бир қисми. Үстимиздики жили биз Алмута шәһириниң һакимийити билән бирликтә мәхсус программа ишләп чиқтуқ. Бу йәрдә мән чиқиндиларни йоқитиш бойичә эксперт сүпитидә болдум. Биз дәсләпкиләрдин болуп экология үчүн муһим болған экомәдәнийәт чүшәнчисини тәвсийә қилдуқ. Бу чиқиндиларға бағлиқ проблемиларни һәл қилиш әмәс, уларниң болмаслиғи йөнилишидә һәрикәт қилиш дегәнни билдүриду. Экофестиваль – биз шәһәрни тәрәққий әткүзүш үстидә иш елип барғандин кейин өткүзгән дәсләпки вә аммивий чарә-тәдбирлиримизниң бири. Буни шәһәр һакими тәстиқлиди. Экофестиваль җәмийәтни трансформацияләшкә қаритилған чоң йолниң беши”, дәйду ECO NetworK ширкитиниң асасини салғучиси Евгений Мухамеджанов.
Пүткүл Қазақстан бойичә лайиһиләр конкурсиға қатнишиш үчүн әризиләр келип чүшти. Таллавелиш йәкүни бойичә мәктәпләрдин вә алий оқуш орунлиридин келип чүшкән әң яхши 10 лайиһә тәвсийә қилинди.
Алмута шәһириниң һакими келәчәктә лайиһини қоллап-қувәтләш нийитидә екәнлигини ейтти.

Йеңи тийин чиқирилди
Қазақстан Миллий Банки «Мисли көрүлмигән вақиәләр вә атақлиқ адәмләр» түркүмидин MANSHUK MAMETOVA. 100 JYL коллекциялик тийинларни муамилигә чиқарди.
Тийин Кеңәш Иттипақиниң Қәһримани Мәншүк Мәметованиң 100 жиллиғиға мунасивәтлик чиқирилди, Қазақстан зәрбханисида (монетный двор) тәйярланди.
Оң тәрипидә (аверс) оттурида Қазақстан Җумһурийитиниң герби, униң оң вә сол тәрәплиридә ― миллий нәқиш элементлири. Айландуруп QAZAQSTAN ULTTYQ BANKI • NATIONAL BANK OF KAZAKHSTAN, төвән қисмида ― тийинниң номиналини көрситидиған 100 TEŃGE, дегән йезиқлар. 
Тийинниң кәйни тәрипидә (реверс) оттурисиға Мәншүкниң портрети, униң сол тәрипидә СССР Қәһриманиниң алтун юлтузи, шундақла туғулған жилни вә юбилейлиқ сәнәни билдүридиған «1922» вә «2022» дегән йезиқлар орунлаштурулған. Оң тәрипидә ― хәритиниң стилизацияләнгән әкси вә «Невель» дегән йезиқ ― Мәншүк Мәметова қәһриманлиқ көрситип, қаза болған шәһәр. Тийинниң жуқарқи қисмиға алий дөләт мукапитиға ― «Кеңәш Иттипақиниң Қәһримани» унваниға тәвсийә қилинған ениқлиминиң стилизацияләнгән мәтини. 
Номинали 100 тәңгә болған MANSHUK MAMETOVA. 100 JYL коллекциялик тийин мельхиор еритмисидин тәйярланди, салмиғи 15 грамм, тиражи 15 миң данә.
 

389 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы