• Көргәзмә
• 16 Наурыз, 2024

Түркиядә «Қәшқәр кочиси»

Мошу жилниң 7 — 10-норуз күнлири Түркийәниң пайтәхти Анкара шәһиридә «ART ANKARA-2024» хәлиқара заманивий тәсвирий сәнъәт көргәзмиси ечилди. Униңға 45 дөләттин 152 рәссам өзлириниң миңлиған әмгәклирини намайиш қил ди. 

Шәмшидин АЮПОВ,
«Uiğur avazi»
 
Онинчи қетим ечиливатқан мәзкүр көргәзмигә тонулған рәссам, Қазақстан Рәссамлар иттипақиниң вә хәлиқара EUROASІAN CREATІVE иҗаткарлар гильдиясиниң әзаси, Қазақстан Җумһурийитиниң хизмәт көрсәткән әрбаби, Қазақстан Җумһурийити рәссамлар академиясиниң академиги Әхмәт Әһәт рәсмий тәклип қилинип, рәссам көргәзмигә өзиниң 12 данә майбояқ әсәрини қойди.
— Бу даириси интайин чоң көргәзмиләрниң бири, — дәйду рәссам. — Униңға қизиқиш чоң болди. Кәлгүчиләрму көп. Мән майбояқ жанридики 12 данә әсәримни қойдум. Майбояқ рәсимлиримдә Қазақстанниң Түркстан шәһиридики Ғоҗа-Әхмәт Йәссавий мәқбәрисиниң 1880-жилқи көрүнүши, Қәшқәрдики кона коча, Турпан туюқ мазарлиридики тәбиәт мәнзирилири әкис етилгән. Бу әмгәкләрдә уйғур хәлқиниң миллий колорити, миллий аһаңи, миллий лирикиси, философияси, сәнъити, миллий қәдрийәтлири өз ипадисини тапқан. Әйнә шу әмгәклиримниң ичидин «Қәшқәр кочиси» намлиқ әсәримни көргәзмигә қәдәм тәшрип қилған ТҮРКСОЙ хәлиқара тәшкилатиниң баш кативи Султан Раевқа соға қилдим. 
 Мениң 1993-жили Түркиядә, 1997-жили Италиядә, 1998-жили АҚШта, 2008-жили Англиядә вә Үрүмчи шәһиридә шәхсий көргәзмилирим өткән еди. Махтанғинимғу әмәс, бүгүнки күндә мениң әмгәклирим дунияниң нурғун мирасгаһлирида, Түркия, АҚШ, Россия, Италия, Германия вә башқиму дөләтләрдә, шәхсий коллекцияләрдә сақлиниватиду. Әндики мәхситим — йәниму дуния мирасгаһлири билән галереялиридә мошундақ көргәзмиләрни өткүзүш. Қазақстан мәдәнийитини, шуниң билән биллә уйғур хәлқиниң бай мәдәнийитини, миллий урпи-адәтлирини, миллий қәдрийәтлирини рәсимлирим арқилиқ дуния мирасгаһлирида көрсәтсәм, өзәмни «әң бәхитлик рәссам» дәп һис қилған болар едим. Бу мениң арминим...

СҮРӘТТӘ: Әхмәт Әһәт (солда) ТҮРКСОЙ хәлиқара тәшкилатиниң баш кативи Султан Раев билән.