• Әхбаратлар еқими
• 12 Сәуір, 2024

«Таза Қазақстан» акцияси башланди

Дүшәнбә күни Президент Қасым-Жомарт Тоқаев вилайәтләр вә шәһәр һакимлириға регионларни аватлаштуруш вә гүлләндүрүш бойичә бирқатар тапшурмилар бәрди. 

Йолдаш МОЛОТОВ, 
«Uiğur avazi»

 Дөләт рәһбири су кәлкүни йүз бәрмигән вилайәтләр билән шәһәрләр һакимлириға кочиларни тазилаш, гүлләндүрүш вә аһалилиқ пунктларни аватлаштуруш мәвсүмини башлашни тапшурди. Шундақла уларға йолларни рәткә кәлтүрүш жүкләнди. Бу ишларға аһалини вә пидаийларни җәлип қилишниң муһимлиғини ейтти. Президентниң ейтишичә, аһалилиқ пунктлар вә җәмийәтлик дәм елиш орунлирини күтүп, пәрвиш қилиш һакимлар паалийитиниң йәнә бир өлчими болмақ. 
 Шуниңға мунасивәтлик, 8-үмүт күнидин башлап яшлар ресурслуқ мәркәзлири вә тәшкилатлириниң тәшәббуси билән «Таза Қазақстан» җумһурийәтлик экологиялик акция башланди. Мәзкүр экологиялик акция бәш һәптигә созулиду вә униң һәрбир һәптиси ениқ бир мавзуға беғишлиниду. 
13-үмүткичә өтидиған дәсләпки һәптиликниң нами – «Таза өлкә». Һәптилик давамида аһалилиқ пункт турғунлири, җәмийәтлик ишлар активистлири, мәһкимә, кархана хадимлири өзлири туруватқан һәм ишләватқан территорияләрни тазилайду. 
20-үмүткичә болған һәптилик «Хасийәтлик макан» дәп атилиду. Бу һәптидә тарихий-мәдәний ядикарлиқларни территориялирини аватлаштуруш ишлири әмәлгә ашурулиду. 
 27-үмүткичә «Йешил өлкә» мавзусида өтидиған һәптилик көчәтләрни тикиш, дәрәқләрни һаклашқа беғишлиниду.
 4-мәмүргичә өтидиған басқуч «Үлгилик әвлат» дәп атилип, ветеранларниң һойлилирини вә қерилар өйиниң территориялирини тазилашқа беғишлиниду.
 «Мөлдүр булақ» дәп атилидиған бәшинчи һәптидә су қоймилириниң әтрапини, дәрия-көлләр әхләтләрдин тазилиниду.
 Мәзкүр акциягә елимизниң барлиқ регионлири қатнишип, Қазақстанниң җай-җайлирида хәйрихаһлиқ вә мәдәний чарә-тәдбирләр өтиду. Алмутида бу экологиялик акция «Алмута – ортақ өйүмиз» умумшәһәрлик мәвсүм даирисидә уюштурулиду.