• Әхбаратлар еқими
• 04 Желтоқсан, 2014

Келәчәк мәшъили

Елимиз Президенти Нурсултан Назарбаевниң қазақстанлиқларға йоллиған новәттики «Нұрлы жол» – келәчәккә башлайдиған йол» намлиқ Мәктүбини диққәт билән оқуп чиқип, яш җумһурийитимиз алдида турған ховуп-хәтәрләр билән аләмшумул синақларға қарши амил ретидә биртүркүм чариләрниң қолға елинғинидин вақип болдум. Бу әснада Дөләт рәһбириниң тапшурмиси билән тәрәққиятниң йеңи миқияслиқ программиси тәйярлинип, «Нұрлы жол» намлиқ Қазақстанниң Йеңи Ихтисадий Сәясити елан қилинди. Мәмликәт Президентиниң қәйт қилишичә, мәзкүр программа ихтисаттики қурулумлуқ ислаһатларни давамлаштурушқа қаритилған. «Һөрмәтлик қазақстанлиқлар! Алда көләмлик вә җавапкәрлик иш туриду. Аләмшумул емтиһандин өтүшимиз үчүн сепимизниң җипсилиғи лазим. Биз барлиқ қазақстанлиқларара ишәнчини күчәйтишимиз керәк. Бир-биримизгә төзүмлүк болушимиз һаҗәт», деди елимиз Президенти өз Мәктүбидә. Йеқин өтмүштин мәлумки, биз, қазақстанлиқлар, пәқәт бирлигимиз, инақлиғимиз, өмлүк вә тиришчанлиғимиз түпәйли әндила мустәқилликкә еришкән яш дөлитимизниң ихтисадий тәрәққияти йолида ишәшлик вә дадил қәдәм ташлидуқ. Течлиқсөйәр вә бәрпакар сәясәтчи, жирақни көзләп, әлни парлақ келәчәккә башлиған Президентимизниң көрсәтмә-тапшурмилирини утуқлуқ орунлап, қисқа вақит ичидә дунияға тонулдуқ. Бу әснада ана дияримизда әзәлдинла иҗил-инақ яшап, бир мәхсәт үчүн маңлай тәрини төккән уйғур билән қазақ вә башқиму милләт вәкиллириниң әҗрини тилға алсақ әрзийду. Җәмийәтлик разимәнлик, турақлиқ, өзара келишимни туғ қилған Уйғур наһийәсиниң аһалисиму Дөләт рәһбириниң әнъәнивий мәктүплирини қоллап-қувәтләп, улардин илһамланған һалда бүйүк мәхсәтләргә йөнилиш алди. Бу қетимму һәм шундақ болиду дәп ишәшлик ейтимән. Чүнки течлиқ, бирлик, төзүмлүк, турақлиқ вә өмлүк билән инақлиқниң күйи яңриған умумөйүмиз Қазақстанда паравән турмуш һәм хатирҗәм һаят орнитиш һәрбиримизниң хаһишидур. Мәһәмәтҗан АБДУРУСУЛОВ, Ғалҗат оттура мәктивиниң мудири. Уйғур наһийәси.