• Әхбаратлар еқими
• 20 Тамыз, 2015

Әслигә кәлтүрүш ишлирини көздин кәчүрди

Алмута шәһириниң һакими Бауыржан Байбек сәлдин зәрдап чәккән Наурызбай наһийәсиниң территориясини көздин кәчүрди. Һаким Каргалинка дәриясиниң жуқуридики Бастау Қарағайлы су бөлүш станциясини көздин кәчүрүп, сәл ақивәтлирини йоқитиш бойичә жүргүзүлүватқан ишниң кетип бериши билән тонушти. Андин кейин у зәрдап чәккән микрорайонниң турғунлири билән учрашти.Йәрлик турғунларниң сөзичә, бу йәрдә электр энергияси вә газға бағлиқ проблема йоқ. Су йәткүзүп беришкә бағлиқ әһвалму назарәт астида. Турғунларға ичидиған су турақлиқ йәткүзүлүватиду. Амма телефон алақиси йоқ. Бауыржан Байбек пәвқуладдә әһвал тәртивини елип ташлаш тоғрилиқ қарарни қобул қилғанлиғини, буниңдин кейин аватлаштуруш ишлирини коммунал хизмәтләрниң давамлаштуридиғанлиғини тәкитлиди. Һаким шундақла сәлдин зәрдап чәккәнләрниң баһалаш комиссияси ишини тамамлиғандин кейин тегишлик компенсация алидиғанлиғиға ишәндүрди. Андин кейин Бауыржан Байбек сәлдин зәрдап чәккән мәктәпләрни зиярәт қилип, уларниң оқуш жилиға тәйярлиғини көздин кәчүрди. Мәсилән, 192-оттура мәктәптә җөндәш ишлири аяқлашти десиму болиду. Мәктәпни җөндәшкә шәһәрдики башқа оқуш орунлириниң муәллимлири, пәвқуладдә вәзийәт хизмитиниң хадимлири, пидаийлар, һәрбий хизмәтчиләр ярдәм қилди. Әпсус, 24 миң дәрислик вә бәдиий әдәбият су астида қалған. Билим бериш башқармисида пат йеқинда барлиқ китап фондиниң толуқтурулидиғанлиғини вәдә қилди. Шундақла мәктәп үчүн йеңи партилар вә компьютерлар сетивелинди. Мәктәп мудири Сәуле Жақсымбетованиң тәкитлишичә, билим дәргаһи 1-сентябрьға толуқ дегидәк тәйяр. 187 вә 188-мәктәпләрдиму әслигә кәлтүрүш ишлири аяқлишип қалди вә уларму оқуғучиларни қобул қилишқа тәйяр. — 1-сентябрьдә барлиқ үч мәктәп балиларни қобул қилишқа тәйяр болуши керәк, — дәп тапшурма бәрди шәһәр һакими.