• Әхбаратлар еқими
• 11 Ақпан, 2016

Разимәнлик үчүн диалог

Қазақстан хәлқи Ассамблеяси Рәисиниң орунбасари – Қазақстан Җумһурийити Президенти Мәмурийити ҚХА Кативатиниң мудири Ералы Тоғжанов Әзәрбәйҗанниң Қазақстандики Пәвқуладдә вә Толуқ һоқуқлуқ Әлчиси Рашад Маммадов билән учрашти.ҚХА Рәисиниң орунбасари вә Әзәрбәйҗанниң йеңи әлчиси сөһбәт давамида течлиқ һәм разимәнлик идеялирини тәрәққий әткүзүш ишида мәмликәтләр оттурисида техиму қоюқ диалогни вә һәмкарлиқни йолға селишқа мунасивәтлик пикир елишти. Ералы Тоғжанов сөһбәтдишиға Қазақстанниң милләтләрара разимәнлик үлгисиниң башқиларға үлгә болуватқанлиғи тоғрилиқ ейтип бәрди вә топланған тәҗрибә билән ортақлишишқа тәйяр екәнлигини билдүрди. У шундақла Қазақстанда барлиқ милләтләрниң мәдәнийитини тәрәққий әткүзүш үчүн шараит яритилғанлиғини вә Әзәрбәйҗан этномәдәнийәт бирләшмисиниң паалийәт елип бериватқанлиғини тәкитлиди. Өз новитидә Рашад Маммадов Ассамблея ишиниң өзигә тонуш екәнлигини, шуңлашқа Әзәрбәйҗанниң Қазақстанға йеқинда тайинланған әлчиси сүпитидики учришишлириниң бирини нәқ ҚХА вәкиллири билән өткүзүшни қарар қилғанлиғини тәкитлиди. У шундақла мәмликитимиздә көплигән милләтләрниң, җүмлидин көпсанлиқ әзәрбәйҗан миллитиниң яшаватқанлиғиға диққәт ағдурди. Дипломатниң сөзичә, өткән әсирниң 40 – 50-жиллирида 300 миңдин ошуқ әзәрбәйҗан Қазақстанға көчирилгән, әнди һазир болса, уларниң иккинчи вә үчинчи әвлади мошу йәрдә яшаватимән һәм Қазақстан җәмийитиниң бир қисми болуп һесаплиниду. — Биз ҚХА — хәлиқ разимәнлиги институти билән этномәдәнийәт мәркәзлири билән қоюқ һәмкарлишимиз, — дәп тәкитлиди әлчи. – ҚХА Рәисиниң орунбасари рәһбәрлигидики Ассамблея делегациясини биздики азсанлиқ хәлиқләрниң әһвали  билән тонушуш вә тәҗрибә алмаштуруш үчүн Әзәрбәйҗанға тәклип қилиш қарари қобул қилинди. Әлвәттә, Әзәрбәйҗандики тәшкилатларниңму җавап сәпәрлири болиду.