• Әхбаратлар еқими
• 22 Шілде, 2016

Тәзийә телеграммисини йоллиди

Қазақстан Президенти Нурсултан Назарбаев Италия Премьер-Министри Маттео Ренциға Бари өлкисидә поездларниң һалакәткә учришиға бағлиқ тәзийә телеграммисини йоллиди.Телеграммида Дөләт рәһбириниң онлиған Италия гражданлириниң һалак болушиға елип кәлгән йолувчилар поездлириниң урулуши тоғрилиқ хәвәрни чоңқур қайғуруп қобул қилғанлиғи тәкитлиниду.

Нурсултан Назарбаев қайғуға ортақлишип, Қазақстан хәлқиниң вә шәхсән өзиниң намидин һалак болғанларниң уруқ-туққанлири билән йеқинлириға көңүл ейтип, зәрдап чәккәнләрниң чапсанирақ сақийип кетишигә тиләкдашлиқ билдүрди.

***

Қазақстан Президенти Түркиядә қураллиқ һөкүмәт ағдуруш һәрикәтниң болушиға мунасивәтлик Президент Реджеп Тайип Эрдоғанға телеграмма йоллиди, дәп хәвәрлиди Президентниң мәтбуат хизмити. Телеграммида Дөләт рәһбириниң айрим һарам ойдики күчләрниң Түркиядә қураллиқ һөкүмәт ағдуруш һәрикити тоғрилиқ хәвәрни чоң тәшвиш илкидә қобул қилғанлиғи тәкитләнгән. «Қайғулуқ вақиә ақивитидин қаза болғанлар билән зәрдап чәккәнләр аилилириниң қайғусиға ортақлишип, тәзийә билдүримиз. Қериндаш түрк хәлқиниң бирликкә вә болған вақиәгә мунасивәтлик чидамлиқ билдүрүшигә чақиримиз. Әһвалниң тез өз әслигә келидиғанлиғиға ишәнчимиз камил. Түрк хәлқи дөләтниң демократиялик йол билән сайланған һазирқи рәһбәрлиги билән биллә ховуп-хәтәрләргә қарши туруп, демократия вә йүксилиш йолидики тәрәққиятини давамлаштуридиғанлиғиға гуман кәлтүрмәймиз» дәп тәкитләнгән телеграммида. Нурсултан Назарбаев Қазақстан хәлқиниң вә шәхсән өзиниң намидин Р.Эрдоғанға тиләкдашлиғини билдүрүп, қериндаш дөләтниң ярқин келәчигигә ишәшлик екәнлигини билдүрди.

***

Дөләт рәһбири Француз Җумһурийитиниң Президенти Франсуа Олландқа Ницца шәһиридә болған террорлуқ һәрикәткә мунасивәтлик тәзийә телеграммисини йоллиди, дәп хәвәрлиди Президент Мәтбуат хизмити. Телеграммида Қазақстан Президенти 14-июль күни Ницца шәһиридә  йүз бәргән террорлуқ һәрикәтниң ақивитидин көплигән бегуна адәмниң қаза болғини вә зәрдап чәккини тоғрилиқ хәвәрни чоңқур қайғуруп қобул қилғанлиғи тәкитләнгән. «Қазақстан терроризмниң һәрқандақ түрини қәтъий әйипләйду, қандақ мәхсәттә болсиму бегуналарниң қенини төкүшни ақлашқа болмайду, дәп һесаплайду», дейилгән телеграммида. Нурсултан Назарбаев қайғуға ортақлишип, барлиқ қазақстанлиқларниң вә шәхсий өзиниң намидин Ф.Олландқа, қаза болғанларниң аилилиригә вә йеқинлириға, шундақла француз хәлқигә тәзийә билдүрди. Дөләт рәһбири зәрдап чәккәнләрниң тез сақийип кетишигә тиләкдашлиқ билдүрди.