• Әхбаратлар еқими
• 08 Қыркүйек, 2016

Тәзийә телеграммисини әвәтти

Нурсултан Назарбаев Өзбәкстан Җумһу­рийитиниң Президенти Ислам Кәримовниң вапат болуши мунасивити билән Өзбәкстан Җумһурийити Олий Маҗлиси Сенатиниң рәиси Ниғматулла Юлдашевқа тәзийә телеграммисини әвәтти.Телеграммида Дөләт рәһбириниң Өзбәкстан Җумһурийитиниң Президенти Ислам Кәримовниң вапат болуши тоғрилиқ хәвәрни чоңқур қайғуруп қобул қилғанлиғи тәкитлиниду. «Қазақстанлиқлар қериндаш Өзбәкстан хәлқиниң бевақит вә орни толмас җудалиғиға ортақлишиду. Оттуз жилдәк янму-ян ишлигән достумдин айрилғинимға ечинимән», дейилиду тәзийә телеграммисида. Нурсултан Назарбаев Өзбәкстанниң ихтисадий ихтидариниң тәрәққий етишигә, униң хәлиқара абройиниң өсүшигә, җәмийәт паравәнлигиниң ашурулушиға ярдәм қилған миқияслиқ өзгиришләрниң жүргүзүлүши мәмликәт мустәқиллигиниң асасини салған Ислам Кәримовниң исми билән бағлиқ екәнлигини тәкитлиди. «У пүткүл һаятини җаниҗан хәлқигә чәксиз садақәтлик билән хизмәт қилишқа беғишлиди, һәрдайим Қазақстанниң ишәшлик дости болди вә хәлиқлиримиз оттурисидики достлуқ һәм яхши хошнидарчилиқниң күчийишигә чоң һәссә қошти. Ислам Абдуғәни оғли Кәримовниң ярқин хатириси қәлбимиздә мәңгү сақлиниду», дәп тәкитлиниду телеграммида. Ахирида Дөләт рәһбири Ислам Кәримовниң уруқ-туққанлири билән йеқинлириға, шундақла мәмликәт рәһбәрлигигә пүткүл қериндаш Өзбәкстан хәлқигә чоңқур қайғуруп тәзийә билдүрди.