• Әхбаратлар еқими
• 25 Қаңтар, 2018

Қишниңму өзигә чушлуқ ләззити бар

Мәшүр САСИҚОВ, «Уйғур авази»/ Өткән дәмелиш күнлири әл-ағиниләр билән Әмгәкчиқазақ наһийәсиниң Қәйнәзәр йезисиға барғинимизда, мошу әтраптики дөңләрдә чана тейиливатқанларниң көплигини көрүп, жилниң бу пәслини яхши көридиғанларниңму йетәрлик екәнлигигә көз йәткүздуқ. Көпчилик бу йәргә бала-чақиси билән келип, таза һавада чанида яки заманивий тейилиш васитилиридә көңүл көтириветипту. Кейинки қелин яққан қар бу йәргә кәлгүчиләрниң санини техиму ашурған екән. Шуңлашқа биз келишимиз биләнла машина қоюш проблемисиға дуч кәлдуқ. Бир амалини қилип, өзимизгә оңушлуқ җай таптуқтә, әл-жутқа қошулдуқ. Бирдә жиқилип, бирдә егиз дөңдин төвәнгә «утуқлуқ» йәткән балиларниң хошаллиғида чәк йоқ. Уларға қошулуп, балилиғини әскә алған ата-аниларму «кәспий» чана тейилиғучилар тәрипидин ечилған йолларда қарға милинип, орнидин туралмай аварә. Әнди қишниң ләззити билән хошаллиғидин хелила тәҗрибиси барлар, өзлирини заманивий йоған баллонларда дөңниң чоққисидин төвәнгә қоюветип, барчини һәйран қалдурмақта... Бу йәрдә димақни йерип турған кавапниң пуриғиму көпчиликни бирдин өзигә җәлип қилиду. Соғда иссиқ чай сетиватқанларниң вә иҗаригә чана, баллонларни беридиғанларниң содиси қайнайдекән. Бир-икки адәм олтиридиған баллонларни бир саатқа 500 — 1000 тәңгә төләп алсиңиз болиду. Атта, ешәктә яки понида сәйлә қилиш баһасиму нәқ шундақ екән. Һәммә нәрсисини өйдә тәйярлап, пәқәт кавапнила пиширишқа елип кәлгән биз охшашларниң у-бу йәрдә от йеқиватқанлиғини көрүшкә болатти. Тәбиәт мәнзирисидә, таза һавада әркин нәпәс елип, һадуғини чиқириватқан дост-бурадәрләрниң хуш чақчақлири чатқални чаң кәлтүрүватиду. Әйнә шундақ тирикчиликниң ғемини бир күнгә унтуп, шатлиққа бөлиниватқан айрим бурадәрләр билән параңлишип қалдуқ. – Бүгүн қизимниң туғулған күни еди. Әл-ағиниләр «кәчтә өйгә келимиз» дәп ейтип берипту, – деди өзини Ислам дәп тонуштурған жигит. – Дәрһал һәммисигә телефон қилдимдә, «өйгә келишниң һаҗити йоқ”, дәп мошу йәргә тәклип қилдим. Тәбиәт мәнзирисигә чиққинимиз бәк яхши болди. Балиларму бираз болсиму телефон, компьютер дегәндин жирақлишип, башлири сәгип қалди. Өзәңлар көрүватисиләр, һазир улардин бәхитлик адәм йоқ. Бизниң мундақ таза һавада дәм алмиғинимизғиму хелә бопту. Һәқиқәтәнму, кейинки жилларда балилиримиз тәрәққиятқа әгишип, һәрхил гаджетларға чаплишивелип, виртуал һаят чаңгилидин чиқалмайла қалди. Һә, қишниң һәрбир күнини болмисиму, һәптиниң дәм елиш күнлирини үнүмлүк пайдилинип, уларни таза һаваға елип чиқсақ, пайдиси болса болидекин, зийини тәгмәйду. Тәкитләш лазимки, һазир шәһәр ичидә көплигән һәқсиз муз мәйданчилири ечиливатиду. Униңдин ташқири, шәһәр әтрапидики дөң-қирларда көпчилик қишниң ләззитини сүрмәктә. Мошуниң һәммисигә, немишкиду, өзгә милләтләргә қариғанда, биз, уйғурлар, унчивала етивар берип кәтмәйдекәнмиз.