• Әхбаратлар еқими
• 29 Наурыз, 2018

«Алтын» сода мәркизигә мәрһәмәт!

Гөһәрбүви ИСМАЙИЛҖАНОВА, «Уйғур авази»/ «Туғулған йәргә ғәмхорлуқ қилишни халайдиған тиҗарәтчиләрни, әмәлдарларни, яшларни қоллаш керәк. Бу һәқиқий вәтәнпәрвәрлик һиссият, у һәркимдә болуши керәк. Уни мәнъий қилмай, әксичә, рәғбәтләндүрүш лазим. Н.Назарбаевниң «Келәчәккә нишан: мәнивий йеңилиниш» мақалисидин.Яркәнт шәһириниң өзидила 3000гә йеқин кичик вә оттура тиҗарәт субъекти бар. Өткән жилниң өзидила ондин ошуқ йеңи объект ишқа қошулуп, 80дин ошуқ адәм турақлиқ иш билән тәминләнди. Мана мошу моҗут болуватқан пурсәт вә ғәмхорлуқлардин үнүмлүк пайдилинип, тәдбирчанлиғи, ишбиләрмәнлиги түпәйли тиҗарәтчилик билән шуғуллиниватқанлар аз әмәс. Аиләвий тиҗарәтни кәң қанат яйдуруватқан исми җумһурийәт даирисигә тонулған Серик вә Гүлнар Ақсубаевлар әйнә шулар җүмлисидин. Норуз мәйрими һарписида Гүлнар Ақсубаева «Алтын» сода мәркизини ечип, пайдилинишқа бәрди. Яркәнт шәһириниң мәркизидә қәд көтәргән икки қәвәтлик сода мәркизиниң ечилишиға наһийә рәһбәрлиги билән җамаәтчилик вәкиллири қатнашти. Униңда Панфилов наһийәсиниң һакими Темирлан Бектасов сөзгә чиқип, көпчиликни заманивий сода мәркизиниң ечилиши билән тәбриклиди. Һаким тәвәдә кичик вә оттура тиҗарәтни кәң қанат яйдуруш үчүн елип бериливатқан ишларға тәпсилий тохталди. Болупму наһийәдә тиҗарәтчилик билән шуғуллинип, наһийәниң ихтисадий-иҗтимаий тәрәққиятиға биркишилик һәссисини қошуватқан, «Туған жер» программиси даирисидә иш елип бериватқан Гүлнар Қазбек қизи билән Серик Муқаш оғлиға миннәтдарлиғини билдүрди. Шуниңдин кейин Социалистик Әмгәк Қәһримани Күләш Айтжанова тәдбирчанлиғиға сахавәтлиги ярашқан Серик билән Гүлнарға анилиқ ақ тилигини билдүрсә, кәсипдаш дости, Алмута вилайәтлик мәслиһәтниң депутати, «Яркәнт крахмал-ширнә заводиниң» мудири Закирҗан Қузиев сода мәркизини бәрпа қилған Ақсубаевларға изгү-тиләклирини изһар қилишти. Өз новитидә сода мәркизиниң мудири Гүлнар Ақсубаева шәһәрликләрни Норуз мәйрими билән тәбрикләп, мәзкүр сода мәркизиниң қурулуш ишлирида тегишлик һәссисини қошқан шәхсләргә аилиси намидин миннәтдарлиғини билдүрди. Тәкитләш керәкки, заманивий «Алтын» сода мәркизидә 100 адәм турақлиқ иш билән тәминләнгән. Икки қәвәтлик сода мәркизидә азадә һәм чирайлиқ безәлләндүрүлгән, қолайлиқ бутикларда чоңлар вә кичик балилар үчүн кийим-кечәк, җиһазлар билән йемәк-ичмәкләрму сетилиду. Сатрашхана билән ашханиму көпчиликниң хизмитидә. Қисқиси, халиғиниңизни мошу йәрдин тепишқа болиду. Панфилов наһийәси.