• Әхбаратлар еқими
• 05 Шілде, 2018

Парихорлуққа қарши күрәш

Сабирәм ӘНВӘРОВА, «Уйғур авази» Дөләт рәһбириниң бийилқи «Төртинчи санаәт инқилави шараитидики тәрәққиятниң йеңи имканийәтлири» намлиқ Мәктүбидә тәкитлигән 10 мәхсәт-вәзипиниң тоққузинчиси парихорлуқ билән күрәшкә қаритилған.Мошу йәрдә «Бүгүнки күндә парихорлуққа қарши күрәш бойичә қандақ ишлар әмәлгә ашурулуватиду?» дегән соалниң туғулидиғанлиғи тәбиий. Ушбу соалға җававән Уйғур наһийәсидә жүргүзүлүватқан бәзибир чарә-тәдбирләргә қисқичә тохтилип өтүшни тоғра көрдуқ. Наһийә һакиминиң, «Нур Отан» партиясиниң һәм наһийә прокурориниң һәмкарлиғида наһийәдә парихорлуққа қарши чарә-тәдбирләр изчил жүргүзүлүп кәлмәктә. Йеқинда Алмута вилайитидин кәлгән 100дин ошуқ һәрхил саһа мутәхәссислириниң қатнишиши билән парихорлуққа қарши күрәш бойичә чоң башқошуш болуп өтти. Мутәхәссисләрниң пикричә, парихорлуқ медицина саһасида көпирәк учришидекән. Мәсилән, у бовақниң сағлам туғулуши үчүн берилидиған пара билән башлинип, ахири хуш хәвәрлиги үчүн берилидиған сөйүнчигә айлинидекән. Наһийәлик Мәдәнийәт өйидә парихорлуқниң алдини елиш бойичә өткүзүлгән жиғинға медицина хадимлири, наһийәдики бөлүм, мәһкимә рәһбәрлири билән биллә йеза округлириниң һакимлириму қатнашти. Жиғинға риясәтчилик қилған Алмута вилайәтлик саламәтликни сақлаш башқармисиниң башлиғи Бауыржан Ысқақ жиғилғанларни күн тәртивидики мәсилиләр билән тонуштурди. Кейин Коррупциягә қарши күрәш җумһурийәтлик мәхсус мониторингиниң топ йетәкчиси Айгүл Соловьева, Коррупциягә қарши күрәш миллий бюросиниң Алмута вилайити бойичә департаментиниң рәһбири Данияр Турғанбаев сөз елип, ақ халат егилириниң Гиппократ қәсәмядиға адил болушқа чақирди. Жиғин давамида саламәтлик саһасида йүз бәргән парихорлуқ әһваллири һәққидә чүширилгән видеороликлар көрситилип, әхбарат берилди. Наһийәлик Мәдәнийәт өйидә өткүзүлгән жиғиндин кейин, вилайәттин кәлгән меһманлар Аришаң участкисидики «Жетісу» дәм елиш орнида наһийәдики тиҗарәтчиләр билән учрашти. Бу йәрдә наһийәдики туризм саһасиниң тәрәққий етиши вә бағ бәрпа қилиш, теплица селиш ишлириниң тез сүръәттә жүргүзүлүватқанлиғи һәққидә сөз болди. Наһийә һакими Шөһрәт Нурахунов Президентимизниң кичик вә оттура тиҗарәтни тәрәққий әткүзүш бойичә бәргән тапшурмилири асасида атқурулуватқан ишларға тохтилип, тиҗарәтчиләр билән һәртәрәплимә иш елип бериливатқанлиғини тәкитлиди. Наһийәлик тиҗарәтчиләр палатисиниң мудири Муслим Амангелди тиҗарәтчиликни риваҗландурушта наһийәниң алға қойған реҗилиригә тәпсилий тохталди. Тиҗарәтчиләр тәрипидин көпирәк несийә елиш мәсилилиригә мунасивәтлик соаллар қоюлди.