• Әхбаратлар еқими
• 25 Шілде, 2018

Телефон арқилиқ сөһбәтләшти

Дөләт рәһбири Нурсултан Назарбаев Россия Федерациясиниң Президенти Владимир Путин билән телефон арқилиқ сөһбәтләшти, дәп хәвәрлиди Қазақстан Җумһурийити Президентиниң мәтбуат хизмити. Дөләт рәһбәрлири сөһбәт давамида иккитәрәплимә һәмкарлиқни, шундақла регионлуқ вә хәлиқара күн тәртивидики муһим мәсилиләрни муһакимә қилди. Шуниң билән биллә икки дөләт рәһбири келәчәктики учришишларниң кәштисини, шуниң ичидә бийил 12-августта Ақтав шәһиридә өтидиған Бәшинчи Каспий саммити даирисидики учришишлар мавзулирини тәһлил қилди. Телефон арқилиқ сөһбәткә Россия тәрипи тәшәббускар болди. *** Дөләт рәһбири Нурсултан Назарбаев Өзбәкстан Җумһурийитиниң Президенти Шавкәт Мирзиёев билән телефон арқилиқ сөһбәтләшти, дәп хәвәрлиди Қазақстан Җумһурийити Президентиниң мәтбуат хизмити. Нурсултан Назарбаев Шавкәт Мирзиёевни туғулған күни билән тәбриклиди. Қазақстан Президенти Өзбәкстан Президентиға зор саламәтлик, бәрикәт вә йеңи утуқлар тилиди. Дөләт рәһбәрлири Өзбәкстан билән Қазақстан арисидики иккитәрәплимә һәмкарлиқниң сүръәтлик тәрәққий етиватқанлиғини, шундақла Мәркизий Азиядики кооперациялик мунасивәтләрниң кәңийиватқанлиғини алаһидә тәкитлиди.