• Әхбаратлар еқими
• 15 Тамыз, 2018

Мениң қошақчи бовам

Әдәбиятқа иштияқ бағлап, қәләм тәвритип жүргәнлигим үчүнмекин, уруқ-туққанлиримиз “Саңа қошқар боваң Норузбақиниң һүнири дариған” дәп қойиду. Ундақ дегишиниң сәвәви, бовам маһир қошақчи болған екән.Норузбақи қошақчи тоғрилиқ тохтилиштин илгири, өтмүшкә бир қур нәзәр селишни тоғра көрдүм. Норузбақиниң Зиявдун, Гүлрүсхан, Һапиз, Илияс, Аруп исимлиқ пәрзәнтлири болған екән. Әнди Зиявдунниң оғли – Уйғур наһийәсиниң Кәтмән йезисида туғулуп, кейинирәк Челәк тәвәсиниң Дехан йезисиға көчүп кәлгән Һесамдун чоң дадам бизниң сулалимиз һәққидә яхши билиду. Униң ейтип беришичә, йәттинчи атимиз Баратқазидин таралған әвлат ичидин Азнибақи – мениң төртинчи атам. Әйнә шуниң изини өчәрмәй, Қазақстан диярида яшаватқан бүгүнки Азнибақиевлар төрт әвлатқа йәттуқ. Азнибақи өз дәвриниң йетүк, илғар кишилиридин болғанлиғини уруш вә әмгәк ветерани Һапиз бовам ейтип бәргәнлиги һели ядимда. Норузбақи әйнә шу Азнибақиниң ялғуз оғли. Норузбақиниң симаси нәврә күйоғли Барат чоң дадамниң ядида яхши сақлинип қапту. – Палван бәстлик, буғдай өңлүк, ақ сақаллиқ бовимиз дайим ешигини минип, дайим хушхой жүридиғанлиғини әс билгәндин бери биләттим. У өзиниң қошақ-бейитлирини ейтип, көңлимизни хуш қилатти, — дәйду Барат чоң дадам. Бир күни мәрһум Һапиз бовам билән дөңдә қой беқиветип, униң ғиңшип нахша ейтиватқинини аңлап қалдим. Мундақ кона нахшиларни мән униңғичә һечбир йәрдә аңлимаптимәнкән. Шуңлашқа натонуш нахша һәққидә бовамдин сориведим, у маңа “Бу дадам Норузбақи тоқуған қошақ. Аһаңиниму өзи иҗат қилған болуши керәк”, дәп җавап бәргән еди. Қошақлирини сеғинип аһаңға қошуп ейтқанда, бәлким, дадиси әскә келәттимекин. Ямғур-йешин көп йеғип, Идир-қирни яр алди. Егиз тағниң кәйнидә Мени сөйгән яр қалди. Мошундақ қошақларни у йәниму қанчилик тоқуғанду?.. Чүнки, бу пәқәт мениң ядимда сақлинип қалған ялғуз қошақ, халас. Норузбақи қошақчини көргән вә униң билән арилашқанларниң ейтип беришичә, Норузбақи асасән вәтән арзуси, ана жут, беғубар яшлиқ, қерилиқ гәшти, ишқ-муһәббәт туйғулирини қошаққа қататтекән. Мән әшундақ қәлбимдә чоңқур из қалдурған қошақчи бовам билән һәқлиқ йосунда пәхирлинимән. Абдулҗан АЗНИБАҚИЕВ.