• Әхбаратлар еқими
• 22 Тамыз, 2018

Қәлбимиздә мәңгү сақлиниду

Елимиз мустәқиллик алғандин кейин миллий әнъәнилиримиз, урпи-адәтлиримиз қайта тиклинип техиму риваҗлинишқа башлиди. Хәлқимизниң миллий моҗутлуғини бәлгүләйдиған һәм мустәһкәмләйдиған бу муһим ишларниң бешида, һәқиқий мәнасида, исми җисмиға лайиқ жигитбашлири турди. Дана хәлқимиз һәрқандақ заманда һәм һәрқандақ маканда өзиниң миллий кимлигини, өмлүгини вә бирликни сақлашниң васитиси вә капалити ретидә жигитбашлири институтини мәйданға елип кәлгән. Жигитбашлирини болса, һәқиқий демократик йол билән хәлиқ ичидики милләтпәрвәр, һөрмәтлик, парасәтлик, миллий әнъәниләрни яхши билидиған һәм жуқури тәшкилатчанлиқ қабилийитигә егә шәхсләрни таллаш нәтиҗисидә сайлинишниму тәминлигән.Җумһурийәтлик Уйғур этномәдәнийәт мәркизи йенида Жигитбашлири кеңишини қуруш зөрүрийити пәйда болғанда, “Қазақстан уйғурлири үчүн муһим болған мәзкүр кеңәшниң рәиси ким болиду”, дегән соал һеч талаш пәйда қилмиди. Бир еғиздин Абдурешит Мәхсүтов кеңәш рәиси болуп сайланди. Сәвәви, у хәлиқниң ичидин тавлинип чиққан һәқиқий жигитбеши еди. Абдурешит Мәхсүтов һәрқандақ мәсилини ойлинип, артуқ һаяҗансиз, өзигә хас салмақ вә парасәт билән йешишни билидиған көпчилик билән тил тепишидиған, пидакар шәхс еди. Азирақ вақит өткәндин кейин, у елимиздики барлиқ уйғур жигитбашлириниң вәкили ретидә Қазақстан хәлқи Ассамблеясиниң әзаси болди. Абдурешит Мәхсүтов җумһурийәтлик Уйғур жигитбашлири кеңишиниң рәиси болуп сайланғандин кейин, тәдриҗий рәвиштә Алмута шәһиридики, Алмута вилайитидә уйғурлар зич орунлашқан наһийәләрдики, башқиму вилайәтләрдики уйғур жигитбашлириниң паалийәтлирини уйғунлаштуруш, уларниң өзара мунасивитини мустәһкәмләш йолида көп күч чиқарди. Шундақла Абдурешит Мәхсүтов Қирғизстандиму Уйғур жигитбашлириниң җумһурийәтлик кеңишини тәшкилләш үчүн көп ярдәм көрсәтти. Шуңлашқа униң пәқәт Қазақстандила әмәс, шундақла Қирғизстандики уйғурлар арисидиму һөрмити наһайити жуқури еди. Кейинки жиллири у ҖУЭМ рәиси, Қазақстан Җумһурийити Парламенти Мәҗлисиниң депутати Шаһимәрдан Нурумов билән хәлқимизниң мәдәнийәт, маарип, мәтбуат саһалири бойичә көплигән муһим ишларни әмәлгә ашурушта өзиниң тәшкилатчанлиқ қабилийитини көрсәтти. Әпсус, тәғдиргә тән бәрмәскә амал йоқ. Амма шуниңға чоқум ишинимизки, Абдурешит Мәхсүтов әлгә хизмәт қилишниң әла үлгисини көрсәткән сәпдишимиз ретидә қәлбимиздә мәңгү сақлиниду. Ярмуһәммәт КИБИРОВ, ҖУЭМ йенидики Жигитбашлири кеңиши рәисиниң вәзиписини вақитлиқ орунлиғучи.