• Әхбаратлар еқими
• 19 Қыркүйек, 2018

Головацкий йезисида йеңи мечит селинди

Гөһәрбүви ИСМАЙИЛҖАНОВА, « Уйғур авази» Мошу йеқинда Панфилов наһийәсидики Головацкий йезисида хошаллиқ вақиә йүз бәрди. Йеза турғунлири көптин бери күткән заманивий мечит бенаси пайдилинишқа берилди. Униң ечилиш мәрасимиға жирақ-йеқиндин кәлгән меһманлар билән жут турғунлири қатнашти.Мәрасим башлиништин илгири Қазақстан Мусулманлири диний башқармисиниң вәкили Серик Шәрипқан ұлы қуръан тилавәт қилди.— Яркәнтлик қериндашлар, йеңи мечит қутлуқ болсун! Бүгүн мән Яркәнт тәвәсидики Қазақстан Мусулманлар диний башқармисида рәсмий ройхәттин өтүп һәм рәсмий тиркәлгән 37-мечитниң ечилиш тәнтәнисиниң гувачиси болуватимән. Бу, әлвәттә, елимиз Президенти Нурсултан Назарбаевниң «Келәчәккә нишан: мәнивий йеңилиниш» мақалиси даирисидә «Туған жер» лайиһисиниң утуқлуқ әмәлгә ешиватқанлиғи дәп билимән, – деди Қазақстан Җумһурийити Билим вә пән министрлиги Шәриқшунаслиқ институтиниң мудири, филологмия пәнлириниң доктори, профессор Әбсаттар һаҗи Дербисәли. Чүнки туғулған жутиға қолидин келишичә биркишилик хизмитини қиливатқан хәйри-еһсанлиқ Тасқин Жапарқул буниңдин икки жил илгири Закирҗан Кузиев, Серик Ақсубаев қатарлиқ тиҗарәтчи жутдашлири билән бирликтә Яркәнт мәркизидә чоң мечит селип, пайдилинишқа бәргән еди. Мана бүгүн Тасқин Жапарқул аилиси билән Алланиң өйини икки мәртә Социалистик Әмгәк Қәһримани, йеза егилиги ишләпчиқиришиниң маһир тәшкилатчиси Николай Головацкий йезисида селип, пайдилинишқа бериватиду. Умумән, наһийәдә көплигән милләтләр иҗил-инақ яшаватиду. Әнди уйғурға әң йеқин ким десәң – қазақ хәлқи. Динимиз бир, дилимиз бир, тил тәгмисун. Бирлигимиз мәңгүлүк болсун. Достлуқ һәм бирликниң арқисида бизниң елимиз тәрәққий қилип, гүлләватиду. Тасқин Жапарқул охшаш тиҗарәтчиләр тапқининиң бир бөлигини йәниму мечит, мәктәп, дохтурхана селип, елигә, туғулған йериниң тәрәққиятиға төһписини қошиду дәп үмүт қилимән. Новәттики натиқларниң бири Алмута вилайәтлик мәслиһәтниң депутати Закирҗан Кузиев: “Қазақстан Җумһурийити мустәқилликкә еришкәндин буян мечитларниң ечилиши муқәддәс динимизни тәрғип қилишқа, болупму яшларниң диний саватини ечишта, диний роһта тәрбийиләшкә муһим әһмийәткә егә екәнлигини тәкитлигүм келиду”, дәп тәкитләп, Тасқин Жапарқулға миннәтдарлиғини изһар қилди. Шундақла Кербулақ наһийәлик Ақсақаллар кеңишиниң рәиси Төленди Сарибаев, Панфилов наһийәсиниң Пәхрий граждини, шаир Исламғали Үркимбайулы, тарихчи, пешқәдәм устаз Молот Солтанаев йеза аһалисини бу хошаллиғи билән тәбриклиди. Өз новитидә сөзгә чиққан Тасқин Жапарқул йеза турғунлири билән мошу хошаллиққа жирақ-йеқиндин, йәни Астана вә Алмута, Талдиқорған шәһәрлиридин кәлгән меһманларға миннәтдарлиғини билдүрүп, Алмута вилайитиниң һакими Амандиқ Баталовниң салимини йәткүзүш билән биллә 500 орунлуқ заманивий үлгидики мечитниң қурулуш ишлирини елип барған, йеқиндин ярдәм көрсәткән жутдашлириға чапан йепип, хатирә соғилирини тапшурди. Шуниңдин кейин мечитниң рәмзлик лентиси қийилип, жиғилған көпчилик мечитниң ичини арилап, җүмә намизини өтиди. Панфилов наһийәси. Жумағази БЕЙСЕБЕК чүшәргән сүрәт.