• Әхбаратлар еқими
• 19 Желтоқсан, 2018

Заманивий сода орни

Сабирәм ӘНВӘРОВА, “Уйғур авази” Наһийәмиздә чоң хошаллиқ. Қизилорда вилайитиниң тиҗарәт вә туризм башқармисиниң уюштуруши билән өткүзүлгән «Сауда үздігі – 2018» җумһурийәтлик конкурсида «Ярлин» супермаркети «Үздік сауда ойын-сауық орталығы, кешені, сауда үйі» номинацияси бойичә 1-орунға егә болди. 2012-жилдин бери уюштурулуп келиватқан бу конкурста «Бөлшек сауда саласындағы үздік кәсіпорын», «Көтерме сауда бойынша үздік кәсіпорын», «Үздік сауда үйі», «Үздік сауда ойын-сауық орталығы, кешені, сауда үйі», «Үздік демалыс орны» вә башқа номинацияләр бар. Бийил елимизниң барлиқ тәвәлиридин кәлгән 100дин ошуқ қатнашқучи арисида “Ярлин” супермаркети ғалип чиққанлар арисида болди. Мәлумки, «Ярлин» супермаркети наһийәмиз бойичә дәсләпки болуп ечилған заманивий сода-сетиқ мәркизидур. Мәркәзниң егилири Қуддус Җәмиев билән Шарванәм Изимова 1992-жилдин буян тиҗарәт билән шуғуллинип кәлмәктә. 1997-жили улар ихчам дукан ечип, уни кәнҗә оғлиниң исмида «Ярлин» дәп атапту. Вақит өтә, тәрәққият билән тәң илгирилигән тиҗарәтчиләр, заман тәливигә мувапиқ йеңи сода-сетиқ мәркизиниң һулини тикләшни қолға алиду. Шундақ қилип, ихчам дукининиң орниға һашамәтлик мәркәз селип, «Ярлин» дукинини «Ярлин» супермаркетиға айландуриду. Әлвәттә, шу чағда наһийәдә мошундақ бир сода-сетиқ мәркизиниң ишқа қошулғанлиғидин пүткүл наһийә аһалиси хурсән болған. Шу чағда биз пәқәт шәһәрләрдин көрүп жүргән супермаркет көз алдимизда қәд көтирип, аһали үчүн һәқиқәтәнму чоң йеңилиқ болған еди. Хулләс, бүгүнки күндә ушбу мәркәздә 30 адәм турақлиқ иш билән тәминләнгән. Ишчиларниң оттура айлиқ мааши 80 миң тәңгиниң әтрапида. Супермаркетта йемәк-ичмәк, кийим-кечәк, қисқиси, күндилик турмушта һаҗәт барлиқ буюмлар сетилиду. Шундақла сүпәтлик мәһсулатларниң баһаси дуканлар билән селиштурғанда, ейтарлиқтәк әрзән. Супермаркетниң босуғисидин атлап, өзиңизгә һаҗәт халиған нәрсини тез издәп таписиз. Қисқа вақит ичидә төләм ясайсиз. Йәнә келип, төләмни банк карточкилири арқилиқ әмәлгә ашурушқиму болиду. «Ярлин» супермаркети – аиләвий тиҗарәт объекти. Униңда Рамин, Шахрин, Ярлин исимлиқ оғуллири билән бир сәптә келинлириму әмгәк қилидекән. Тиҗарәтниң жүкини аилә әзалири бирлишип зиммисигә алғачқа болса керәк, супермаркет қисқа вақит ичидә бираз утуқларғиму йәтти. Қуддус ака тиҗарәттин бөләк хәйрихаһлиқ акциялиригә давамлиқ қатнишип, һамийлиқ қилиду. Мошу йәрдә җумһурийәтара йоруқ көридиған «Лучшие люди мира» намлиқ китапта Қуддус ака Җәмиев һәққидә мақалә йезилғанлиғини алаһидә тәкитләп өтүш орунлуқтур. Җәмләп кәлгәндә, буниң һәммиси мәшәқәтлик әмгәкниң йемиши вә кәспигә садиқ тиҗарәтчиниң йеңишидур.