• Әхбаратлар еқими
• 30 Қаңтар, 2019

Өзара һәмкарлиқ кәңийиду

Мәшүр САСИҚОВ, «Уйғур авази» Өткән һәптидә «Қазақ газеттері» җавапкәрлиги чәкләнгән йолдашлиғиниң рәһбәрлиги Евразия илмий-тәтқиқат институтида болуп, униң паалийити билән тонушти. Қазақстан мәтбуат саһасида өзигә лайиқ орни бар гезит-журналларниң муһәррирлирини бу билим дәргаһиниң баш мудири Вакур Сумер иллиқ қарши алди. Дәсләп меһманлар университет бенасини арилап, униң маддий-техникилиқ базиси билән тонушқач, у йәрдә ишләватқан, йәни Евразия даирисидики һәмкарлиқни тәрәққий әткүзүштә илмий-тәтқиқат ишлирини жүргүзүватқан алимлар билән пикирләшти. Андин уларни мудир билим дәргаһиниң түркий хәлиқләр тарихиға, ихтисадиға, мәдәнийитигә мунасивәтлик 5000 китап фонди бар китапханиға тәклип қилди вә униң өзгә китапханилардин пәриқлинидиған алаһидиликлири тоғрилиқ әтраплиқ әхбарат бәрди. Мәсилән, мудир китапханида Ахмет Яссавий, Маһмут Қәшқәрий, Йүсүп Хас Һаҗип охшаш бүйүк затларниң әмгәклириниң бар екәнлигини қәйт қилип, институт хадимлири әйнә шу әсәрләр асасида иш елип бериватқанлиғини йәткүзди. «Қазақ газеттері» ҖЧЙниң рәһбәрлиги билән институт коллективиниң рәсмий учришиши билим дәргаһиниң Мәҗлисләр залида өтти. Униңда дәсләп йолдашлиқ коллективини җумһурийәтлик «Ана тілі» гезитиниң баш муһәррири Жанарбек Әшімжан саһипханларға тонуштурғандин кейин институтниң Баш мудири Вакур Сумер сөзгә чиқип, меһманларға Ғоҗа Ахмет Яссавий намидики Хәлиқара қазақ-түрк университети – Қазақстан Җумһурийити билән Түркия Җумһурийити Һөкүмити арисида имзаланған иккитәрәплимилик келишим асасида қурулған, хәлиқара мәртивигә егә алий билим дәргаһи тоғрилиқ тәпсилий мәлумат бәрди вә институт хадимлириниң илмий тәтқиқат ишлириниң икки мәмликәт оттурисидики мунасивәтни кәңәйтишкә қошуватқан һәссисигә тохталди. Болупму Вакур Сумер Евразия илмий-тәтқиқат институтиниң йеңи ечилғиниға қаримай, түркий тиллиқ мәмликәтләрниң бешини қошуп, стратегиялик лайиһиләрни тәйярлаш арқилиқ Евразия даирисидики һәмкарлиқни техиму тәрәққий әткүзүшни мәхсәт қилидиғанлиғини тилға алди. Натиқ сөзара институтниң пәқәт тарихий вә илмий ишлар биләнла чәкләнмәйдиғанлиғини ейтип өтти. Учришиш давамида меһманлардин «Ана тілі» гезитиниң баш муһәррири Жанарбек Әшимжан, «Ақиқат» журналиниң баш муһәррири Аманхан Әлим, «Уйғур авази» гезитиниң баш муһәррири Ершат Әсмәтов вә «Мысль» журналиниң баш муһәррири Аяған Сандыбай институт рәһбәрлигигә миннәтдарлиқ билдүрүп, мудирға өзлирини қизиқтурған соалларни қойди. Институт мудири Ершат Моллахун оғлиниң соалиға җававән кәлгүсидә Қазақстан хәлқи Ассамблеяси һәм Р.Сулейменов намидики Шәриқшунаслиқ институтиниң Уйғуршунаслиқ мәркизи билән мунасивәт орнитип, иҗадий һәмкарлиқ орнитишқа, җүмлидин көпмилләтлик Қазақстандики җәмийәтлик вә милләтләрара разимәнлик, хәлиқләр достлуғи, уйғуршунаслиқ мавзулириға мураҗиәт қилидиғанлиғини ейтти. Өз новитидә, Вакур Сумер институт паалийитиниң җанлинишиға әхбарат васитилириниң атқуридиған ролиниң муһимлиғини тәкитләп, келәчәктә өзара һәмкарлиқни кәңәйтиш тәкливини бәрди.