• Әхбаратлар еқими
• 20 Ақпан, 2019

Президент һозурида

Нурсултан Назарбаев “Лукойл” нефть компаниясиниң президенти Вагит Алекперовни қобул қилди. Учришиш давамида нефть-газ саһасида инвестициялик һәмкарлиқни техиму тәрәққий әткүзүш мәсилилири муһакимә қилинди. Қазақстан Президенти “КазМунайГаз” вә “Лукойл” компаниялири оттурисидики шериклик мунасивәтләрниң иҗабий тәрәққий етип, нәтиҗидарлиқ болуватқанлиғини тәкитлиди. – Биз узундин буян “Лукойл” компанияси билән ишләватимиз. Силәрниң компания Россиядә чоң компанияләрниң бири болуп һесаплиниду. Силәр шундақла Қазақстандики әһмийәтлик россиялик инвесторларниң бири. “Лукойл” мәмликәт ихтисадиға 9 миллиард АҚШ доллириға йеқин инвестиция бөлди, – деди Дөләт рәһбири. Нурсултан Назарбаев Россия компанияси билән буниңдин кейинму инвестициялик һәмкарлиқни күчәйтишкә мәнпийәтдар екәнлигини билдүрди. Сөһбәт давамида Дөләт рәһбиригә Каспий деңизиниң Қазақстан қисмида углеводород хамәшиясини издәп тепиш вә өзләштүрүш бойичә “Жеңис” лайиһисини бирлишип әмәлгә ашуруш планлири тоғрилиқ тәпсилий әхбарат берилди. Униңдин ташқири “Лукойл” нефть компаниясиниң президенти Нурсултан Назарбаевқа Қазақстан территориясидә майлаш материаллирини чиқиридиған завод қурулушиниң кетип бериши тоғрилиқ әхбарат бәрди. – Карханиниң пландики қувити жилиға 100 миң тоннини тәшкил қилиду. Заманивий завод майлаш материаллириниң һәммисини дегидәк чиқириду. Бу 700гә йеқин мәһсулат түрини өз ичигә алиду, – дәп тәкитлиди Вагит Алекперов. Учришиш давамида шундақла илғар технологияләрни пайдилинип, йеңи углеводород канлирини издәш бойичә бирләшкән ишни жүргүзүш, шундақла Россия компаниясиниң Қазақстан Җумһурийитиниң Энергетика министрлиги тәйярлаватқан 2021 – 2025-жилларға бәлгүләнгән геологиялик разведка программисиға қатнишиш мәсилилири муһакимә қилинди. *** Нурсултан Назарбаев хәлиқара спорт мусабиқилириниң ғалиплирини қобул қилди. Дөләт рәһбири билән болған учришишқа Миллий олимпиада комитетиниң президенти Тимур Қулыбаев, Мәдәнийәт вә спорт министрлиги Спорт вә тәнтәрбийә ишлири бойичә комитетиниң рәиси Серик Сәпиев, фристайл-могул бойичә хизмәт көрсәткән спорт маһири Юлия Галышева, кәспий боксчи Садриддин Ахметов, муз үстидә фигурилиқ тейилиш бойичә хәлиқара дәриҗидики спорт маһири Элизабет Турсынбаева, трамплиндин чаңғуда сәкрәш бойичә хәлиқара дәриҗидики спорт маһири Сергей Ткаченко қатнашти. Нурсултан Назарбаев елимизниң спорт саһасини тәрәққий әткүзүшкә вә хәлиқара спорт мәйданлирида Қазақстанниң абройини көтиришкә һәссә қошқан яш маһирларниң хизмити алаһидә тилға алди. – Мән силәр билән учрашқинимға хурсәнмән. Бу жил мәмликәттә Яшлар жили дәп елан қилинди. Әнди спорт болса, асасән яшларниң иши. Дөләт мошу саһаниң тәрәққий етишигә алаһидә диққәт бөлүватиду. Силәргә қарап, яшлар спорт билән шуғуллинишқа вә сағлам һаят тәризигә әмәл қилишқа тиришмақта. Силәрниң утуқлириңлар дөләтниң абройини ашурушқа ярдәм қиливатиду, – дәп тәкитлиди Президент. Өз новитидә яш спортчилар хәлиқара мусабиқиләрдә көрсәткән маһарити, алған тәсиратлири билән ортақлишип, келәчәккә бәлгүлигән планлири тоғрилиқ сөзләп бәрди. – Мән һәрқачан Қазақстан яшлирини спорт билән шуғуллинишқа чақиримән. Барлиқ вилайәтләрдә заманивий спорт инфрақурулумлири бар. Стадионлар селинип, йепиқ комплекслар қәд көтәрди. Спорт – саламәтлик вә узақ һаят кәчүрүш капалити, – деди Нурсултан Назарбаев. Дөләт рәһбири яш спортчиларниң кәспий җәһәттин техиму өсүшиниң истиқбалиға диққәт ағдурди. – Егиләйдиған чоққилириңларниң техи алда екәнлигини көрүватимән. Дуниявий мусабиқиләрдә медаль йеңивелиш оңай әмәс. Яшларниң силәрдин үлгә елип, сағлам вә күчлүк болуп өсүшини халаймән, – деди Қазақстан Президенти. Ахирида Нурсултан Назарбаев атлетларни қол йәткүзгән утуқлар билән чәклинип қалмай, йеңи муваппәқийәтләргә йетишкә чақирди. Учришишта яш спортчиларға Қазақстан Президентиниң намидин хатирә соғилар тапшурулди.