• Әхбаратлар еқими
• 03 Сәуір, 2019

Дуния чемпионатиға йолланма алди

Сабирәм ӘНВӘРОВА, «Уйғур авази» Йеқинда Талдиқорған шәһиридә өсмүрләр арисида армрестлинг бойичә Қазақстан чемпионати өтти. Мәзкүр мусабиқигә елимизниң барлиқ тәвәлиридин һәқиқий спорт маһирлири қатнашти. Уйғур наһийәлик Балилар вә өсмүрләр спорт мәктивиниң командисиму болди. У йәрдә бизниң палванлиримиз топ йерип, наһийәгә олҗилиқ қайтти. Яш чемпионлиримизниң Польша Җумһурийитидә өтидиған дуния чемпионатиға 2 йолланма, Қирғиз елидә өтидиған Азия чемпионатиға 1 йолланма алғанлиғини аңлап, хошаллиғимиздин бешимиз көккә йәтти. Ениғирақ ейтсақ, җумһурийәт чемпионатида 5-Чонҗа оттура мәктивиниң оқуғучилири Адилҗан Ибрагимов билән Рамиль Һосманов күмүч медальға еришип, Польшаға йолланма алса, күмүч медаль саһиби аталған 1-Чонҗа оттура мәктивиниң оқуғучиси Диана Авутова Қирғизстанда елимиз шәнини қоғдимақчи. Шундақла мәзкүр чемпионатта яшлар арисида 75 килограмм салмақ дәриҗисидә Гүлвира Һевуллаева күмүч медальға, 80 килограмм салмақ дәриҗисидә Таисия Шевченко бронза медальға муйәссәр болуп қайтти. «Устазсиз шагирт болмайду» демәкчи, мошу йәрдә спортчиларни җумһурийәтлик мусабиқигә тәйярлиған наһийәлик Балилар вә өсмүрләр спорт мәктивиниң мәшиқләндүргүчиси Нуржан Ахуновниң әстаидил әмгигини алаһидә тилға елиш лазимдур. Хулләс, мәктәп оқуғучиси туруп, чоң утуқ-муваппәқийәтләргә қол йәткүзгән яшлиримизниң келәчәктә елимизниң туғини техиму егиз көтиридиғанлиғиға ишәнчимиз камил.