• Әхбаратлар еқими
  • 19 Маусым, 2019

Хәлиқ дипломатиясиниң қирлири

Қазақстан пәйтәхтидә болуп өткән учришишта МДҺ әллири, Грузия, Литва дипломатик корпусиниң вә Қазақстан хәлқи Ассамблеясиниң вәкиллири ихтисадий һәмкарлиқни кәңәйтиш имканийәтлирини муһакимә қилди. Учришишниң бешида ҚХА Рәисиниң орунбасари — Қазақстан Җумһурийити Президентиниң Мәмурийити Ассамблея Кативатиниң мудири Жансейит Түймебаев Қазақстан Президентиниң инаугурацияси билән тәбрикләп, бу вақиәниң Қазақстанниң чәт әлләр билән һәмкарлиғини тәрәққий әткүзүшкә йеңичә күч-қувәт қошидиғанлиғини тәкитлиди. 29-апрельда Қазақстан хәлқи Ассамблеясиниң ХХVII сессияси өткүзүлди, у Ассамблея тарихида йеңи сәһипини ачти, чүнки сессиягә Тунҗа Президент — Елбасы Нурсултан Назарбаев билән Қазақстан Президенти Қасым-Жомарт Тоқаев қатнашти. Дәсләпки қетим Ассамблея вәзипилириниң ташқи сәясәт йөнилиши бәлгүләнди. Ташқи ишлар министрлири билән бирликтә униңғиму бирқатар тапшурмилар берилди, — дәп мураҗиәт қилди Жансейит Түймебаев әлчиләргә. Биринчи тапшурма чәтәллик инвесторлар билән ихтисадий һәмкарлиқни кәңәйтишкә мунасивәтлик. Этномәдәнийәт бирләшмилириниң бизнес-қурулумлири асасида ҚХА Тиҗарәтчиләр ассоциацияси қурулуп, униң тәркивигә 200дин ошуқ кархана кириду. Мәзкүр һөкүмәтлик әмәс тәшкилатниң мәхсити бизнес, йеза егилиги саһалирида инновациялик-индустриал жуқури технологиялик лайиһиләрни қоллап-қувәтләштин, инновациялик вә индустриал саһасида Қазақстанға лайиһиләрни җәлип қилиштин, җәмийәтни иҗтимаий йеңилашқа ярдәм қилиштин ибарәт. Иккинчи тапшурма — ишчанлиқ алақиларни тәрәққий әткүзүш вә мәмликәткә инвестицияләрни җәлип қилиш үчүн ҚХАниң чәтәллик достлири клубини қуруш. 2018-жилдин тартип йеңи институт — Ассамблеяниң чәт әлләрдики достлуқ әлчилири ишләватиду. Һазир вәзипә кәң даиридә қоюлуватиду. Биз тиҗарәтчилиримизгә мәхсәтлик программиларни вә лайиһиләрни ишләп чиқиш, уйғунлаштуруш вә әмәлгә ашурушта хелә нәтиҗидарлиқ ярдәм қилған, Қазақстанда яшаватқан милләтләр тарихий келип чиққан мәмликәтләрдин чәт әл инвестициялирини җәлип қилған, түрлүк, җүмлидин чәтәллик тәшкилатлар билән һәмкарлиқни кәңәйткән, йеңи инновациялик лайиһиләр билән мәхсус ихтисадий зониларға киришкә ярдәм қилған болар едуқ, — деди ҚХА Рәисиниң орунбасари. Шундақла тиҗарәтчи-Қазақстан хәлқи Ассамблеясиниң вәкиллирини чәт әлләр билән иккитәрәплимилик ишчанлиқ кеңәшләргә җәлип қилиш тапшурулди. Бу бизнесменларниң уттур алақилирини кәңәйтишкә, ениқ лайиһиләрни әмәлгә ашуруш бойичә әмәлий иш үчүн шараит яритишқа ярдәм қилиду. ҚХА мошу күз пәслидила хәлиқара бизнес-форум өткүзүп, түрлүк милләт тиҗарәтчилириниң бирләшкән лайиһилириниң көргәзмисини уюштурушни планлаватиду. Жансейит Түймебаев бу ишниң Қазақстанда яшаватқан милләтләр тарихий келип чиққан мәмликәтләрдин инновацияләрни вә жуқури технологияләрни җәлип қилиш һәм җарий қилиш үчүн яхши муһитни вуҗутқа кәлтүридиғанлиғиға, хәлиқ дипломатияси асаслирини күчәйтидиғанлиғиға ишәнчә билдүрди. Дипломатик корпус вәкиллири бу тәклипләрни мақуллиди. Әзәрбәйҗанниң Қазақстандики әлчиси Рашад Маммадов сентябрьдә Нур-Султан шәһиридә Әзәрбәйҗанниң биринчи сода өйини ечишниң көздә тутулуватқанлиғи, Ақтавда селинған логистикилиқ мәркәз тоғрилиқ сөзләп бәрди вә инвестицияләрни җәлип қилишқа ярдәм қилиш бойичә тәклипләрниң инвесторлар үчүн яхши имканийәт яритидиғанлиғини тәкитлиди. ҚХА — Қазақстанда разимәнлик вә хәлиқләрниң гүллиниши асасида өзара һәрикәтни қандақ утуқлуқ уюштурушни көрсәткән надир институт, биз униң үчүн Нурсултан Назарбаевтин чәксиз миннәтдармиз, — дәп қоллуп-қувәтлиди кәсипдишини Беларусь Җумһурийитиниң Қазақстандики әлчиси Анатолий Ничкасов. — Йеңи тәшәббуслар бу сәясәтни мәнтиқий тәрәққий әткүзүватиду вә наһайити өз вақтида оттуриға қоюлған.Ихтисадий дипломатияни кәңәйтиш вәзиписи қоюлди вә бу сөзсизки, биз үчүнму имканийәтни кәңәйтиш болуп һесаплиниду.

27 рет

көрсетілді

0

пікір
Алдыңғы мақала Яшлар форуми өтти
Келесі мақала “Қасым-Жомарт Тоқаев – хәлиқ таллиған лидер”

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы