• Әхбаратлар еқими
• 19 Маусым, 2019

“Қасым-Жомарт Тоқаев – хәлиқ таллиған лидер”

Насирахун РОЗАХУНОВ, «Уйғур авази» Қазақстан Җумһурийити Парламенти Мәҗлисиниң депутати, җумһурийәтлик Уйғур этномәдәнийәт мәркизиниң рәиси Шаһимәрдан Нурумов новәттин ташқири өткән президент сайлиминиң йәкүнигә изаһ бәрди. Униң пикричә, Президент сайлимида Қасым-Жомарт Тоқаевниң ғалибийәт қазиниши тәбиий әһвал. Сайламда Қасым-Жомарт Тоқаевни аваз бериш һоқуқиға егә 6 миллиондин ошуқ қазақстанлиқ қоллиди. Бу мәмликитимиз хәлқи Елбасы Нурсултан Әбишоғли Назарбаевниң стратегиялик йолини давамлаштурушни таллавалғанлиғиға гувалиқ қилиду. «Этномәдәнийәт мәркизиниң рәһбири сүпитидә мән милләтләрара течлиқ вә разимәнлик тәрәпдари, шуниң үчүнму мән шәхсән Қасым-Жомарт Тоқаев үчүн аваз бәрдим» дәйду хәлиқ вәкили. Ш.Нурумовниң ейтишичә, Дөләт рәһбириниң хизмитигә киришиш мәрасимида сөзлигән сөзи алаһидә диққәткә сазавәр. – Қасым-Жомарт Кемелоғли қуруқ вәдә қилмай, ишләш керәклигини алаһидә тәкитлиди. У гражданларниң һәқиқий паравәнлиги униң үчүн наһайити муһим екәнлигини тәстиқлиди. Бу қазақстанлиқларниң һаят шараитини яхшилашқа үмүт пәйда қилиду. Президентниң кәңдаирилик программисини орунлашқа ярдәмлишиш үчүн Һөкүмәткә вә Парламентқа нурғун һәм тиришип ишләшкә тоғра келиду, — дәп тәкитлиди Мәҗлис депутати. Һазирниң өзидә Қасым-Жомарт Тоқаевниң тәшәббуси бойичә Миллий җәмийәтлик ишәнчә кеңиши қурулди. Мәзкүр кеңәш җәмийәтниң барлиқ қатламлириниң мәвқәлири қарилидиған надир мәйданға айланмақчи. — Хәлиқниң пикригә диққәт ағдурған наһайити муһим. Қ.Тоқаевниң инаугурациядә ейтқинидәк, һакимийәт билән җәмийәт оттурисидики диалог дайим тәрәққий әттүрүлүши тегиш, униңсиз бизгә күчлүк һәм риқабәткә қабил Қазақстанни қуруш мүмкин әмәс. Өз пикрини изһар қилиш – демократияниң әң асасий принциплириниң биридур, – дәп тәкитлиди Шаһимәрдан Нурумов.