• Әхбаратлар еқими
• 03 Қазан, 2019

Хәлиқ артисти — Пәхрий профессор

Мәшүр САСИҚОВ, «Уйғур авази» Түнүгүн Абай намидики Қазақ миллий педагогика университетиниң Мәҗлисләр залида Қазақстан хәлиқ артисти, «Парасат» ордениниң саһиби Гүлвира Разиеваниң иҗадий кечи болуп өтти. Униңға ушбу билим дәргаһиниң студентлири билән устазлири һәм бирқатар җамаәтчилик вәкиллири қатнашти. Кәч башлиништин илгири, Гүлвира Турсунқизиниң иҗадий паалийитидин учур беридиған видеосюжет көрситилди. У йәрдә асасән қайтиланмас һәм өзигә хас җараңлиқ авазға егә сәнъәткарға Мурат Әвезов, Роза Бағланова кәби атақлиқ шәхсләрниң бәргән баһаси вә униң һәрхил тилларда ейтқан нахшилири орун алған болуп, уни тамашә қилған яш әвлат вәкиллиридә чоңқур тәсират қалдурди. Мәзкүр билим дәргаһиниң ректори Такир Балықбаев Гүлвира Разиеваниң Қазақстан эстрадисиниң тәрәққиятиға қошқан төһписигә әтраплиқ тохтилип, өткән әсирниң сәксининчи жиллири университетта устазлиқ қилғанлиғини алаһидә тәкитлиди. Шундақла натиқ мошу вақит ичидә билим бәргән шагиртлири арисида тонулған җәмийәт әрбаплири билән атақлиқ сәнъәткарларниң йетилип чиққанлиғиниму қәйт қилди. У өз сөзидә университетниң музыка факультети өзиниң 50 жиллиғини Гүлвира Разиевадәк инсанға һөрмәт көрситиштин башлиғанлиғини тилға елип, у яққа чапан кийдүрүп, университетниң «Пәхрий профессори» гуванамини тапшурди. Гүлвира Турсунқизи бүгүнки мәрасимға қуруқ қол кәлмигәнлигини ейтип, билим дәргаһиниң мирасгаһиға елимизниң Тунҗа Президенти — Елбасы Нурсултан Назарбаев билән биллә чүшкән рәсимини вә өзиниң нахшилириниң топлимини һәдийә қилди. Кәч давамида сәнъәткарниң һөрмитигә музыка факультетиниң студентлири тәрипидин концерт көрситилип, кәч қатнашқучилири Гүлвира Разиева билән хатирә сүрәткә чүшти.