• Әхбаратлар еқими
• 14 Қаңтар, 2021

Улуқ адәмләр, улуқ анилар

Пайтәхттә “Улуқ шәхсләрниң улуқ анилири” намлиқ китапни тонуштуруш мәрасими болуп өтти.
Китап аниларға беғишлиниду вә дуния тәрәққиятиға һәм миллионлиған адәмләрниң тәғдиригә тәсир қилған улуқ шәхсләрни тәрбийиләп инсанийәт тарихида из қалдурған аялларниң һаятиға асасланған.
Бу — улуқ шәхсләрниң анилириға беғишлинип, Қазақстанда дәсләпки қетим нәшир қилинған әмгәк. Уларниң арисида Елбасы Нурсултан Назарбаевниң, Россия Президенти Владимир Путинниң, атақлиқ футболчи Пелениң, алимлар Томас Эдисон билән Дмитрий Менделеевниң, Франция императори Напалеон Бонапартниң анилири бар.
Мәркизий коммуникацияләр хизмитидә китапни униң муәллипи – Қазақстанниң хизмәт көрсәткән әрбаби, сәнъәтшунаслиқ пәнлириниң доктори, профессор Арыстанбек Мухамедиулы тонуштурди.
– Китапниң алаһидилиги шуниңдики, униң қәһриманлири мурәккәп шараитта өсүп тавланған, – деди муәллип. – Мәсилән, Владимир Путин туғулғанда аилисиниң коммунал пәтирдә яшап, униңда һәтта каривәтниң болмиғанлиғини әсләйду. Шу чағда аниси кир яйидиған ағамчидин асма “бөшүк” ясиған вә пат-пат балисиниң қешида болуш үчүн кәчки қаравул болуп ишқа орунлашқан екән.
Китапта шундақла Сингапур җумһурийитиниң тунҗа премьер-министри Ли Куан Юниң балилиқ чағлири тоғрилиқму һекайә қилиниду. Мәсилән, униң атиси әшәддий қимарваз болуп, әң ахирқи ахчисини вә аялиниң зебу-зенәтлириниму тавқиға қоювәткән екән.
Тонуштуруш мәрасимида шундақла Қазақстан хәлқи Ассамблеяси Рәисиниң орунбасари, “Qazaq TV” телеканилиниң мудири Майя Бекбаева сөзгә чиқип, инсанниң әң муһим сүпәтлириниң униң балилиқ чеғида шәкиллинидиғанлиғини тәкитлиди.
“Улуқ шәхсләрниң улуқ анилири” китави Алмутида “Қазақ энцеклопедиясы” нәшриятида 2000 нусха билән чиқти вә пат-йеқинда кәң оқуғучилар аммиси билән үз көрүшиду.